AGUSTINETAKO hotelaren ordez 16 etxebizitza egitea proposatzen duen
dokumentuari alegazioa aurkeztu dio Bildu Hernani plataformak, beren hitzetan ez
baitu zentzurik egingo denak. BHk dio udalak bi arrazoietan oinarritu duela
hotelaren ordez etxeak egitea: ´hotel erabilpenak zentzurik ez duela iritzi dute.
Zergatik: eraikinaren tamainagatik ez delako nahikoa hotel kate batek interesa
azaltzeko eta aldiz haundiegia delako familia negozio batentzat`. Kritikatu dute
hotela batzuen edo besteen beharretara egokitu beharrean kendu egin nahi dutela
´baina ez herri antolaketa kontuan hartu dutelako, dirua ateratzeko baizik, gero
haurtzaindegian inbertitzeko. Gu ez gaude haurtzaindegiaren kontra, baina,
gauzak ondo egin behar dira eta ezin da hirigintzarekin horrela jokatu` dio BHk.
Beren hitzetan hirigintza herria antolatzeko erabili behar da ´eta horrek
plusbaliak lortzea badakar... ondo; baina, ezin da dirua lortzeko modu bezala
ulertu eta udalak onartutako fitxan ez du antolaketari buruzko ezer esaten`.
Hotelaren beharra
Plataformaren iritziz udala alde batera uzten ari da ´promotore
inmobiliarioek hotel bat bultzatzeko hartu zuten konpromisoa`, eta herrian
horrelako zerbitzu baterako dagoen beharra ez dutela kontuan hartu uste du BHk.
Alegazioak azpimarratzen du Turismo Garapenerako Plan Estrategikoak hotel plazak
gehitzeko beharra nabarmentzen duela. Horrez gain, datu gisan azpimarratu dute
fetxa seinalatuetan alojamenduak erabat betetzen direla herrian eta legez
kanpoko alojamendu eskaintza haundia dagoela.
BHren iritziz ´hirigunean turismoa eta merkataritza garapena ekarri lezakeen
hotel bat jartzeko orube bakarra` ezabatuko da erabaki honekin eta ´Hernaniko
herriaren etorkizun urbanistiko eta sozio ekonomikoan eragin haundikoa izango
da`dio.
Haurtzaindegiko hitzarmena
Haur eskola berria finantziatzeko egingo dituzte hotelaren ordezko 16
etxebizitzak, BHk dioenez eta beren esanetan ´hitzarmen hau eragiketa
finantziero nahasi bat da, Legea eta Administrazio Publikoen Kontratazio Arauak
hausten dituena`. Alegazioak dio, Udalak orubearen rekalifikazioa onartu duela
´eta honen ordainez Agustinatako promotoreak 420.708 euro ordaindu behar dizkio
haurtzaindegia egingo duen kontratistari eta kontratista honi zuzenean haur
eskolaren obra adjudikatuko zaio (1.300.000 eurotik gora)`. Horrez gain herri
plataformak azpimarratzen du ´eragiketa arraro hau borobiltzeko sinatzaile den
beste sozietate batek ere kontratistari 700.000 euro emango dizkio Udalari eman
ordez eta haur eskola finantziatuko dute sozietate honek, promotereak eta
kontratistak Udalari zor dizkioten kopuruekin, baina Udalak diru hori zuzenean
jaso gabe`.
´Akatsak daude`
Prozedura guzti honetan akatsak ikusten ditu BHk eta horiek nabarmendu ditu
alegazioan. Lehengo 49 etxebizitzek eta oraingo 16ek 65 batzen dituztela
azpimarratu du; eta behin 50 etxebizitza ezkero babes ofizialekoak behar duela
%20k, ´eta horiek ez dituzte kontuan hartu`. Bestetik, 16 etxebizitza horiei
legokiekeen eremu irekia ere ez da kontuan hartzen BHren hitzetan. Eta azkenik,
BHk dio legearen arabera, etxebizitzak egitean lortzen den aprobetxamenduak udal
ondasunak haunditzeko funtzio nagusia behar duela: ´legeak hala dio: ondasuna
haunditzeko edo etxeak egin ahal izateko lurra erosteko erabili behar da
aprobetxamendu hori normalean, eta hemen ez dugu horrelakorik ikusten`.