IÑAKI Arratibel Zinegotziak Hirigintza Batzordearen izenean erantzun dio
Bildu Hernanik Sagastiyako etxebizitzen inguruan esandakoei. Arratibelek honela
dio oharrean: ´Asko pozten gaitu Bildu Hernaniri etxebizitza babestuaren
inguruko interesa piztu zaiola ikusteak. Hain zuzen ere etxebizitza babestuen
arrastorik ere ez denean antzeman bere burua ezker abertzaletzat duen horrek
Hernaniko Udal Gobernuaren buruan igarotako urte luzeetan burutu diren
ekintzetan; ezkerrari buruz duten ikuspegi bitxiaren ondorioz, seguruenik`.
Etxebizitza politika
Arratibelek dio positiboa iruditzen zaiela BH ´Rekondo buru izan duen Udal
Gobernuek bultzatako etxebizitza babestu politikara biltzea` eta azpimarratzen
du politika horri eskerrak gauzatu direla babestutako etxeen inguruko operazio
garrantzitsuak, ´esaterako Antziola edo Sagastiyan`. Sagastiyako proiektuari
dagokionez, Arratibelek dio BHk badakiela ´Udal teknikariak hasierako
onespenaren aurretik derrigor egin behar diren txostenak bukatzen ari direla
momentu honetan`.
Zenbait zalantza
Prentsa ohar bukaeran Hirigintza Zinegotziak dio zenbait zalantza argitu
gabe daudela ´esate baterako zergatik tematu zen ezker abertzalea aurreko
agintaldian Txantxillan eraikitako etxebizitzen artean etxebizitza babestuen
kopurua %20 murrizten, udala lurzoruaren %40aren jabe izan arren?`. Horren
harira azpimarratu du oraingo Udal Gobernuak operazio hura desegin behar izan
zuela ´hernaniarrentzat benetan onuragarria izan zedin`.