DENEN ahotan dabil telebista digital berria (TDT delakoa) eta
horregatik jo du Kronikak Mariano Alda Telemarreko gerentearengana telebista
digital berriaren nondik norakoak argitzeko eta jarri nahi izan ezkero zer
urrats eman behar diren jakiteko, horrez gain telebista digitalak eskainiko duen
programazioaz ere hitz egin digu.
Mariano Aldak azaldutakoaren arabera Hernaniko etxeetako %80ean ikusi ahal
izango dira telebista digitalak eskainiko dituen 35 bat kateak, zonalde
batzuetan ezin baita seinalea harrapatu.
2010erako herritarren telebista guztiak sistema honetara moldatu beharko dituzte
telebista ikusten jarraitu nahi baldin badute behintzat. Sistema analogikoa
desagertu egingo da.
Zein urrats eman eta zenbat kostatzen den
Kanal digital hauek ikusi ahal izateko ez da telebista zaharra zakarretara
bota beharrik izango; nahiko da antena moldatzea (komunidadekoa ala partikularra)
eta telebistari seinale digitala deskodifikatzeko aparailua erostea. Nahi izanez
gero badaude telebista berriak seinale digitalerako prestatuta, baina oraindik
ez dago aukera askorik merkatuan.
Seinalea deskodifikatzeko aparatu hauetan aukera desberdinak daude Mariano Aldak
azaldutakoaren arabera. Merkeenek 60 bat euro balio dute batez-beste baina duten
desabantaila da nahiko konplikatuak direla jartzerako garaian. Badaude jartzen
errazagoak direnak eta erderaz datozenak; horiek 100 euro balio dute batez-beste.
Badaude aurreratuagoak diren deskodifikadoreak ere, telebista interaktiboan
aritzeko aukera ematen dutenak, baina oraindik ere ez dago horrelako telebista
kateetan aukera haundirik, nahiz eta aurrerago etorriko den. Telebista
interaktiboak emango du aukera esate baterako: telebistako debate eta
lehiaketetan parte hartzeko eta musika jaitsi, besteak beste.
Antena moldatzean aldiz 600 eta 1.400 euro artean kostako da, komunidadearen
tamainaren arabera.
Hortik aurrerakoa, hau da programazioa, ez da ordaindu beharrik izango.
Zer ikusi ahal izango den
Mariano Aldak azaldu du 35 bat telebista kanal ikusteko aukera izango dela
TDTarekin. Telebista kanal asko egun dauden kateetatik sortuko dira: RTVEk 7
kanal, Antena 3k 3 kanal, Telecincok 3 kanal, EITBk 4 kanal eta Cuatrok 3 kanal.
Horrez gain lizentzia berriak ere emango dira, telebista lokaletarako 4 kate
banatuko dira adibidez. Kate berri horietako asko espezializatuak izango dira:
haurrentzako programazioa, informatiboak, musika, kirolak, eta abar.
Telebistako deskodifikadoreak kanal horiek ikusteko aukera emateaz gain, orain
dauden kateak kalitate digitalean ikusteko aukera ematen du. Horrek esan nahi du
ez dela interferentziarik izango, ezta elurra deitzen zaion hori ere (punto
txuri eta beltzak).
Demanda eta informazio eskean jende asko
Mariano Aldak azaldu du Hernanin Telemar denda dela sistema hori jarri
dezakeen bakarra eta dio demanda asko ari direla izaten, eta informazio eskean
jende asko etorri zaiela ere bai.