MUSIKAREKIN lotuta bi emanaldi izango dira datorren abenduaren 13 eta 14an
Biteri kultur etxean. Abenduaren 13an, asteartea, Lunfardo taldeak musika eta
dantza uztartuta, tango ikuskizuna eskainiko du. Bestetik, abenduaren 14an,
ostegunean, Pirineos Jazz Orchestrak Tam-Tametik Tom- Tomera ikuskizuna ekarriko
du, musika eta antzerkiaren bidez jazzaren historian egindako ibilbidea. Bi
emanaldiak arratsaldeko 20:30etan hasiko dira, Biterin.
Argentinako bihotzetik tangoa Biterira
Lunfardo kamarako taldea da eta ibilbide luzea duten musikari profesionalek
osatzen dute. Ahotsa, gitarra, kontrabajoa eta eskusoinuaren bidez tangoa
ekarriko dute Argentinako bihotzetik. Musikariez gain bi tango dantzarik ere
parte hartuko dute. Ikuskizunean denetariko piezak entzun ahal izango dira:
tango ezagunak, abestutako tangoak, tango instrumentalak, eta taldeak propio
sortutako tangoak: Melodia de arrabala, Mano a mano, La yumba, Por una cabeza, Y
dicen que no te quiero, Yira yira, Invierno porteño, Quejas de bandoneòn, A
media luz, Libertango eta La cumparsita, besteak beste.
Jazzari buruzko kontzertu didaktikoa
Pirineos Jazz Orchestrak eskainiko duena jazzaren inguruko kontzertu
didaktikoa izango da. Tam-Tametik Tom -Tomera ikuskizunean musikari itsu baten
bidez jazzaren bilakaera ezagutu ahal izango du ikusentzuleak: afrikar esklabuak
Ameriketara eraman zituztenetik gaur eguneraino. Aktoreak hamabi eszenatan
kontatuko ditu jazzaren inguruko gora beherak.
Pirineos Jazz Orchestrako musikariek aldiz ibilbide horretan izandako
bilakaeraren adibideak eskainiko dituzte: work songs, ragtime eta spirituals,
roch´n roll, beboop eta free jazza, swing eta dixieland, eta abar.
Aipatzekoa da Pirineos Jazz Orchestra taldean badagoela musikari hernaniar bat:
Roberto Pacheco saxofoi jolea.