JOAN den astean aurkeztu zuten Ficoba erakusketa azokan Lurraldebus garraio
sozietateak izango duen irudi korporatiboa. Lurraldebus martxoan sortu zen
Gipuzkoako herri arteko hainbat autobus zerbitzu koordinatzeko asmoz, horien
artean Hernaniko Garayar eta Areizaga autobusak. Aurkezpenean azaldu zutenez 181
autobusek osatuko dute Lurraldebus eta guztira 12.815 pertsonentzako plazak
izango ditu Gipuzkoan.
Gris metalizatua, autobusen kolore berria
Ficoban ikusi ahal izan zen Lurraldebus osatzen duten autobus konpainiek
nolako irudia izango duten. Autobusek kolore gris metalizatua izango dute eta
Lurraldebus jarriko die kolore gorriz idatzia. Hosto bat izango dute sinbolo
bezala. Dena den, autobus bakoitzak bere lehenagoko kolorea izango du
karrozeriako hainbat lekutan, erabiltzaileak identifikatu dezan (Hernaniko
kasuan urdina batzuek eta gorria besteek). Horretaz gain, asmoa dago
geltokietako markesinak aldatzeko, hauek ere kolore gris metalizatua izango dute.
Beste berritasun bat GPS sistema izango da, honen bidez autobusaren zai dagoenak
jakingo du autobusa zein lekutan dagoen eta zenbat denbora geratzen zaion
geltokira iritsi arte, hori guztia markesinetan egongo diren panel batzuetan
ikusi ahal izango da. Gainera, autobusetan segurtasun kamarak jartzeko asmoa
dago.
Ordaintzeko sistema berria eta ‘txartel bakarra’
Ordaintzeko sistema erabat aldatuko da: makina berriak jarriko dituzte eta
ordaintzeko, txartel berezi bat irakurgailutik pasata egin ahal izango da.
‘Txartel bakarra’ ezartzea da azken helburua: autobus linea ezberdinetan
bidaiatu ahal izango da batean bakarrik ordainduta. Zenbait geltokitan
bidaiariak berak lehenago ordaindu ahal izango du geltokian espendedoreak
jarrita.
Hala ere, ‘Txartel bakarra’ ezartzeak denbora gehiago emango duela aurrikusi
dute proiektu honen arduradunek. Horretarako Konpentsazio Zentro bat sortu behar
baita, txartelaren errekargak eta tarifa sistemak kudeatzeko. Zein motatako
txartelak jarri (bonoak eta abar) Diputazioaren esku geratuko da.
Bi hilabete barru Hernanin
Lurraldebusek Hernanin nola eragingo duen jakiteko Kronikak bertako autobus
konpainiengana jo du, zehazki esateko, Garayar autobusen arduradunekin hitz egin
du. Bertatik adierazi dutenez Lurraldebus egitasmoak ´atzerabiderik ez du` eta
Diputazioak datorren urtean zehar neurri guztiak martxan jartzeko asmoa du, hala
ere gauza asko dituzte zehazteko oraindik.
Lehenengo autobusaren irudia aldatuko dute, horretarako dirulaguntzak eskatzeko
Dekretua astelehenean bertan kaleratu zuen Diputazioak. Bi hilabete barru hasiko
dira seguruenik autobusak kolorez aldatzen, pixkanaka. Hala ere, Garayarretik
diotenez Ficoban erakutsi zen modeloari aldaketa batzuk egingo dizkiote
´autobusak lehenago zuen kolorea hobeto bereizteko`, diote.
Markesina berriekin ere arazo batzuk izan dira, lekuaren arabera egokitu behar
baitira: ´Ficoban erakutsi zutena, Atsegindegin ez da sartzen, adibidez`, diote
garraio konpainia honetatik. Garayarrek ziurtatu du datorren urterako GPS
sistema probatzen hasiko direla, bai Atsegindegin eta baita Donostiarako bidean
dauden sei geltokitan ere. Markesinetan egongo diren panelak eguzki plaken bidez
funtzionatuko dute.