HERNANIKO Elkartzen-ek mozioa aurkeztu du Udaletxean, bertako plenoan
eztabaidatu dezaten, Udal Aurrekontuei begira. Ostiralean azaldu zuten
prentsaurrean, taldeko kideek, mozio horretan zer jaso nahi duten, lau puntutan
laburbildua:
1) Udal Aurrekontuak: Aurrekontuen inguruko eztabaida ireki bat izateko
´beharrezkoak diren mekanismoak` sortzea eskatzen du Elkartzen-ek. Talde honen
ustez momentu honetan ez dago eztabaida sozial edo politikorik (irizpideak,
lehentasunak...), eta horren aurrean Aurrekontuak herritarren parte hartzearekin
osatu behar direla diote.
2) Etxebizitza: Hutsik dauden etxeak erabili behar direla dio Elkartzen-ek
´ulergaitza eta iraingarria` iruditzen baitzaie etxe hutsen kopurua. Bestetik
alokairuzko etxeen parkea sortzeko Udalak ´etxebizitzen aprobetxamenduaren %15`
erabili dezala eskatzen du eta horretara bideratu dadila baita ere kontribuzioan
biltzen den %10a. Gainera, kontribuzioa bost aldiz biderkatu beharko
litzatekeela uste du talde honek. Hori guztia etxebizitza eskaerari aurre
egiteko
3) Udal tasen ordainketa: Mozioak biltzen duen beste puntu bat da tasen
ordainketa modua. Bertan proposatzen da pobreziaren mugaz azpitik dauden
pertsonek (778 euro azpitik hilean), udal zerbitzuetako tasak ez ordaintzea; eta
kiroldegia edo haurreskola bezalako zerbitzuen tasak kalkulatzeko orduan,
kontuan hartu dadila pobreziaren muga hori.
4) Bonobusa: Elkartzen-ek proposatzen du Aurrekontuaren %2a bideratu
dadila bonobus eta bonobus soziala martxan jartzeko.
Taldeen babesa
Elkartzen-ek hainbat talderen babesa jaso du mozioa Udalean aurkezteko
garaian: ELA, ESK, LAB, Gazte Asanblada, Ate Joka eta hainbat auzo elkarte.
Prentsaurrean adierazi zutenez lehenengo aldia da mozioa horrelako babesarekin
aurkezten dutela eta politikoek babes horri arreta jartzeko eskatu zuten.