SANTA Zezilia inguruan urtero ematen du kontzertua Hernaniko Musika Bandak
eta gaur izango da kontzertua, Santa Zezilia eguna pasa eta hurrengo igandean.
Urteroko moduan estreno bat izango dute aurten ere: Jacob de Haanen Oregon obra
hain zuzen ere. Horrez gain, Joaquin Ortega Canario hernaniarraren A Joxe Amiano
obra ere entzuteko aukera izango da gaur eta Bandak aspaldi jo gabeko
Teixidorren Fiesta en la caleta eta B. Zapirainen La Dama de Anboto obrak ere
bai. Gaurko kontzertua osatzeko Morricone-De Meyren Moment for Morricone obra
eskainiko dute.
Berrogeita lau kide
Musika Banda 40 bat lagunek osatzen dute gaur egunean, eta gaurko
kontzerturako lau bat apoio ere izango dituzte: Musikenetik etorriko diren maila
altuko lau ikasle perkusionista hain zuzen ere. Gaur ere Bandako instrumentu
guztiak entzuteko aukera izango da: flauta; oboea; rekintoa; klarinetea; saxo
altua, tenorea eta baritonoa; fliskornoa; tronpeta; bonbardinoa, tronpa;
tronboia; tubak; eta perkusioak. Zipri Otxandorena zuzendariak Kronikari esan
dionez 12 mota perkusio joko dituzte gaur, kanpaiaren hotsa egiten duen bat
tartean.
Kontzertua arkupeetan izango da, arratsaldeko 13:00etan. Ondorenean, musikari
guztiak bazkaltzera joango dira Zumardi jatetxera, urteroko ohitura ez galtzeko.