Musika Eskolako ikasleek girotu zuten Santa Zezilia eguna

Urtero egiten dute kontzertua Musika Eskolako ikasleek Santa Zezilia egunarekin eta atzokoak ere izan zuen arrakasta. Larogei ikasletik gora izan ziren urteetako lanaren emaitza jendaurrean azaltzen eta Biteriko areto nagusia lepo bete zen. Alboka, txalaparta, dultzaina, txistua, trikitixa, pianoa, akordeoia, saxofoia, tronpeta, klarinetea, perkusioa, biolina, biolontxeloa eta gitarra dira musika eskolan ikasi litezkeen instrumentuak eta guztiek izan zuten beren tartetxoa atzoko kontzertuan. Guztira 19 kanta eskaini zituzten ikasleek, modu eta jatorri oso desberdinetakoak.

Domina banaketa
Lehengo ikasturtean 2 eta 3garren maila bukatu zuten ikasleei dominak eman zizkieten atzoko kontzertuan. Ikasturtean, 2garren maila 39 ikaslek bukatu zuten eta 3garren maila 4 ikaslek.
Musika eskolak 3 maila desberdinetan erakusten du musika: lehen maila hastapenekoa da eta 4-7 urte arteko umeei zuzendua dago: erritmoa landu, kantatu, entzun... egiten dute. Bigarren maila sei urtetakoa da 7 urtetik gorako edonork eman lezake izena bertan: instrumentu bat jotzeko oinarrizko maila hartzea da sei urte hauetan helburua. Hirugarren maila ere 6 urtetakoa da eta bigarrena gainditu ondoren hasi litezke ikasleak hirugarren maila honetan: instrumentuan sakontzea da helburua.

Hogeitaka urteko historia
Musika Eskolak ibilbide luzea du Hernanin. 1984an sortu zen kontserbatorio elemental moduan, baina, aurretik bazen akademia moduko bat Udaletxean. Kontserbatorioa zenean, titulazio ofiziala ematen zuen, baina, lege aldaketak medio, 1992-93 ikasturtean Musika Eskola bihurtu zen. Gaur egun kurtso asko ematen ditu, baina, titulazioak ez dira ofizialak. Ikasleek maila altua dutenean Donostiako kontserbatoriora jotzen dute askotan titulazio ofizialaren bila. Garai batean Udaletxean zegoen Musika Eskola eta 10 urte daramazki Atzietan.