URTERO egiten den moduan, aurten ere Pablo Lasa Artisau Azoka antolatu du
Gabiltza taldeak, negua iristearekin batera. Igandean izango da, abenduak 4,
Gudarien Plazan. Bertan jarriko dituzte Gipuzkoatik eta Nafarroatik etorritako
artisauen 25 postu eta horietatik 6 hernaniarrenak izango dira: Maider Kalonje (egur
taila); Iñaki Gorostidi (miniaturazko harriak); Mo (serigrafia); Kulunka (marketeria);
Benigno Albeniz (uztarriak); Errapia (zeramika) eta Anastasia Leunda (ezkurra).
Bestalde, 3 artisau etorriko dira Nafarroatik eta beste guztiak Gipuzkoako
hainbat herritakoak dira: Zarautz, Donostia, Ataun, Oiartzun, Irun... Artisautza
produktu ezberdinak ikusi eta erosteko aukera izango da igandean: pitxiak,
jostailuak, zeramikazko piezak, oihalak... Horretaz gain artisauek beren
produktuak nola egiten dituzten ikusi ahal izango da.
Txalupen erreplikak
Antolatzaileek azaldu dutenez, aurten gonbidatu berezi bat ekarriko dute
azokara: Pasai Donibaneko Ontziola zentroko lan-taldea. Zentro horretan garai
bateko itsasontzien erreplikak egiten dituzte, horien ikerketa bultzatzearekin
batera. Igandean erreplika horietako batzuk ekarriko dituzte eta ontziak nola
egiten ziren erakutsiko dute jendaurrean.
Tailerrak, jatekoak eta musika
Postuez gain, umeentzako eskulan eta sormen tailerrak ere antolatu dituzte.
Gainera, izango da zer janik: taloak, txorixoa, eztia, pastak, txokolateak,
pateak, ogia, pastelak...
Giroa alaitzeko musika izango da egun osoan zehar. Dultzaina jotzen ariko dira
Irungo Agirretxe anaiak eta Hernaniko musika eskolako trikitilariek ere girotuko
dute plaza ingurua. Hau guztia goizeko 11:00etatik 14:30etara eta arratsaldeko
17:00etatik 20:00etara izango da.
Gazteen 11garren Dantza Txapelketa Plaza Berrian
Artisau Azokarekin batera, Hernaniko Gazteen Dantza Txapelketa antolatu ohi du Kriskitiña dantza taldeak. Aurtengoa hamaikagarrena izango da. Eguerdiko 12:00etan, Plaza Berrian.