«Askatasunean eta berdintasunean oinarritutako harremanak behar ditugu»

Hiru ideia nagusi
Hitzaldia jendeak galdetzen dion bidetik gidatuko duela argi utzi du Maria Antonia Carok, baina, 3 ideia nagusi azpimarratu ditu:

1) Biolentzia sexista gizarte guztiaren gauza da. Botere publikoek zeresan haundia dute baina datuak ikusita denon kezka behar lukeela argi dago: 2004an 94.111 denuntzia jaso ziren estatuan tratu txarren ondorioz eta 36.775 babes orden eman ziren (EAEn 704 babes orden eman ziren). Horrez gain, 69 emakume izan dira biolentzia honen ondorioz erailak 2004an eta horietatik 3 Bilbon izan dira.

2) Heziketa positibo baten beharra azpimarratu du Carok ´harremanen kalitatearen alde`. Askatasunean eta berdintasunean oinarritutako harremanak izaten erakustea arazo honen konponbidearen muinetako bat dela dio adituak: ´administrazioari eskatu behar diogu babesa eman eta laguntza sozio-ekonomikoak bideratzeko biolentzia sexistako biktimei, baina, gizartearen lana da bakarrik sentitzen diren biktima hauei laguntzea eta neska mutilak balore egokietan hezitzea`. Bide horretan kanpaina bat ari dira gauzatzen ikastetxeetan berdintasunean oinarritutako harremanak: kalitateko maitasuna izenburupean eta erantzun oso ona izaten ari du kanpainak Caroren hitzetan: ´garai batean maltratoa gaiaren bueltan egiten genituen jardunaldiak eta ez zen inor etortzen, baina orain, berdintasunezko harremanak izaten erakusteko tailerrak egiten ditugu eta demanda izugarria da`. Carok azpimarratu du hezkuntzan ez dela egin litekeen guztia egiten, eta behar adina laguntza ere ez dutela ematen erakundeek, heziketa lan horretarako. Hala ere, garai batetik izugarri aurreratu dela nabarmendu dio Kronikari: ´lehengo garaiak ezagutu genituenok badakigu hori`.

3) Lege integralak urtebete bete du eta balorazioak egiteko goizegi iritzi arren, legeak gauza onak dituela nabarmendu du: ´adibidez biktimen eskubideak kontuan hartzea, edo arazoak tratamendu integrala behar duela azpimarratzea`. Baina, hutsuneak ere ikusten dizkio: ´paperetik errealitatera tarte haundiegia dago oraindik. Horrez gain, legeak irtenbidea ia erabat bide judizialetan jartzen du eta bide judizialen alde egon arren, garrantzi gutxitxo ematen dio heziketari`.

Esanda bezala

---

´Berdintasunaren bidean asko aurreratu da eta bestela begiratu bat eman atzera. Kontua da oraindik ere bide luzea dagoela egiteko`.

---

´Nik uste dut biktimek eta erasotzaileak biak behar dutela tratamendu terapeutikoa, baita, epaitegietatik pasa gabeko kasuetan ere`.

---

´PPk hasitako eta PSOEk jarraitu duen bide bat bada, arazo sozialak epaitegien bidetik konpontzekoa. Ezinezkoa da hori, errekurtso askoz gehiago dedikatu behar zaizkio heziketari`.

---

´Berdintasunean, askatasunean, eta autonomia pertsonalean oinarritutako harremanak behar ditugu. Harremanen kalitatea dago jokoan`.