BILDU Hernanik, Kronikara bidalitako prentsa ohar batean, hernaniar guztiei
igandean izango den Kaiera ekimenean parte hartzeko deia luzatu die. BHk
gogorarazi du ekimen honekin salatu nahi direla ´Madrilen 200 euskal herritarren
aurka hasi behar diren epaiketak`.
Eskubide zibil eta politikoak
Testuinguru honetan BHk azpimarratu nahi izan du epaiketa hauetan 9
hernaniar daudela auziperatuak eta elkartasuna adierazi nahi diete. BHk epaiketa
hauek ulertzen ditu ´Madrileko gobernuak azken urte hauetan bideratutako
politikaren azken emaitza` bezala eta gogorarazi du ´urte hauetan komunikabideak
itxi` egin direla ´Egin edo Egunkariaren kasua; alderdi politikoak eta gizarte
mugimenduak ilegalizatu dira: Batasuna, Gestorak, Haika, Segi... Atxilotu ugari
torturatuak izan dira eta azken batean eskubide zibil eta politikoen etengabeko
zapalkuntza bizi izan dugu` azaldu du Bildu Hernanik.
BHren ustez eraso hauen azken helburua da Euskal Herriaren nazio eraikuntzan ari
diren mugimendu guztiak ezabatzea eta Euskal Herria ukatzea. Hori dela-eta, BHk
dei egiten die ´euskal herritar guztiei nazio eraikuntzan inplikatzeko eta bide
honetan ari diren ekimen eta mugimenduak indar berrituekin bultzatzeko`.
Bi zita igandean
BHk igande honetan bi zita nagusi gogorarazi nahi izan ditu: goizeko
10:00etan Egineko egoitza aurrean eta eguerdiko 12:00etatik aurrera Plaza
Berrian.