ATZO aurkeztu zuten, Udaletxeko pleno aretoan, Gure artean euskaraz
programako aurtengo edizioa. Eta bertan izan ziren egitasmoa aurrera ateratzeko
laguntzen duten Elkarte eta erakundeetako ordezkariak: Dobera Euskara Elkartea,
Udal Euskaltegia, AEK eta Udaleko Euskara Zerbitzua.
Ezagutzatik erabilerara tarte haundiegia
Atzoko aurkezpenean Idoia Illarramendik hartu zuen lehenengo hitza eta
Doberaren partetik esan zuen egitasmoa martxan jartzea erabaki zutela 2001ko
azterketa batek esaten zuelako euskara erabilera ez zela ezagutzaren erdira ere
iristen eta helduen artean erabilera bultzatu behar zela ikusi zutelako.
Programak bi adar ditu: alde batetik euskaltegietako ikasleak eta bestetik
ikastetxeetako gurasoak. Illarramendik adierazi zuen egitasmoak ez duela
euskaldun berrien artean bakarrik eragin nahi: ´euskaraz hitz egiteko ohitura
galdu duten euskaldun zaharrek horretarako gune bat izango dutela ere ziurtatu
nahi dugu`, esan zuen.
Programa honetan parte hartzen dutenak taldeka bilduko dira eta talde bakoitzean
laguntzeko prest dagoen euskaldun zahar bat egotea nahi dute egitasmoaren
arduradunek: ´lehengo urtean arazoak izan genituen figura hori betetzeko eta
aurten dei berezia egin nahi dugu euskaldun zaharrak animatu daitezen egitasmoan
laguntzera`, esan zuen Doberako ordezkariak.
Euskaltegietako hormetatik ateratzeko aukera
Ohiana Romerok, euskaltegien izenean esan zuen egitasmo honek aukera ematen
diela ikasleei euskaltegietako hormetatik atera eta euskaldun zaharrekin hitz
egiteko, kaleko hizkera erabiliz.
Bukatzeko, Txema Mercado, euskara zinegotziak hitz egin zuen. Mercadok eskerrak
eman zien euskaraz hitz egiten duten euskaldun zaharrei: ´oso erraza da
euskaldun berrien aurrean erdarara jotzea eta euskaraz hitz egiteko ahalegina
egiten dute` esan zuen. Udalak euskara arloan bi helburu nagusi dituela azaldu
zuen zinegotziak, ezagutza bultzatzea, baina baita erabilera sustatzea ere. Alde
horretatik esan zuen aitzakia asko daudela euskaraz ez egiteko, baina ´lotsa
galdu` behar dela. Horregatik zorionak eman zizkien egitasmoaren arduradunei eta
jendea animatu zuen bertan parte hartu dezaten.
Izena emateko epea urriak 30ean bukatuko da
EGITASMOAREN antolatzaileek esku orriak banatuko dituzte Doberan,
euskaltegietan eta ikastetxeetan. Esku orriak beteta eman daiteke izena,
urriaren 30a arte. Hala ere, beranduago parte hartzeko aukera ere badago,
egitasmo irekia baita. Bi parte hartzaile bereizi dituzte: bata laguntza nahi
duena eta bestea laguntza emateko prest dagoena
Atzoko prentsaurrekoan azaldu zutenez, seguruenik azaro erdialdera hasiko dira
lan-taldeak biltzen. Lan-talde txikiak izango dira hiru edo lau pertsonatakoak
eta ordutegia eta maiztasun malgua izango da, talde bakoitzak erabakiko du noiz
eta non bilduko den.