RAFAFA magoaren magia ikuskizuna izango da igandean Garin tabernan.
Haurrentzako ikuskizuna prestatu du bereziki baina helduek ere parte hartzeko
modukoa izango da. Kartak, zapiak, pizarrak eta beste hainbat gauza erabiliko
ditu Rafafak eta Hernanin egin dituen beste saioetan bezala denak harrituta
utziko ditu. Emanaldia igandean, urriaren 9an, izango da. Eguerdiko 13:00etan,
Garin tabernan. Umorea eta magia izango dira nagusi emanaldian.
Gero eta ezagunagoa
Rafafa magoa Hernani eta inguruetan gero eta ezagunagoa egiten ari da. Ez da
aurreneko aldia Hernanin emanaldia egiten duena eta inguruko herrietatik ere
eskatu diote joateko: Oiartzun, Donostia eta Lasartetik esaterako.
Magia munduan duela 5 bat urte hasi zen. Hasieran ospitaleetan aritzen zen clown
edo pailazoarena egiten, ingresatuta zeudenak alaitzen. Hortik hasi zitzaion
magiarako grina eta Gipuzkoako Mago Elkartean murgildu zen. Bertan Txan eta
Marsel bezalako magoak topatu zituen eta haiekin asko ikasi zuela adierazi dio
Kronikari. Liburuetatik ere asko ikasi omen du.