BILDU Hernani plataformak adierazi du ´lotsagarria eta iraingarria` iruditzen
zaiola azkeneko plenoan PSOEko kideek eta Alkateak izan zuten jarrera eta baita
beste alderdi politikoen ´isiltasuna` ere.
Kronikara bidalitako idatzian BHk salatu nahi du PSOEren jarrera ´zapaltzailea
eta errepresiboa berak eskatu baitzuen BHko zinegotzia zegokion lekutik
bidaltzea` adierazi du. Horrekin batera dio PSOEk argi utzi duela ´bera izan
dela ezker abertzalearen ilegalizazioaren aintzindaria eta bere aurpegi ilunena
nabarmendu du, lehen GALekin egin zuen bezala eta orain ilegalizazioarekin eta
milaka eta milaka euskal herritarren eskubideen zapalkuntzarekin`.
BHk dio ´Rekondo eta bera babesten duten taldeen jokaera` onartezina dela:
´behin eta berriz diote ilegalizazioaren aurka daudela baina gero ekintzetan
ilegalizazioa eta eskubideen urraketa babesten dute` aipatu du. Horrekin batera
diote ´egoera diktatorial honetatik probetxu politikoa eta pertsonala ateratzen`
dutela.
´Rekondo bere burua zuritzen`
BHk dio ez dela konformatuko ´Rekondo jaunak berak bere burua zuritzeko eman
nahi dizkigun ogi papurrekin`. Diote herritarrek aukeratutako zinegotziak
direnez ´dagozkien eskubide guztiak modu batean edo bestean eskuratzen saiatuko`
direla. Lotsagarria iruditzen zaie ´Rekondok merito bezala hartzea udal
bilkuretan hitz egiten uztea`.
Ilegalizazioa gainditu
Azkenik diote badaudela moduak ilegalizazioa gainditu eta hernaniarren
eskubideak babesteko eta azaldu dute BH prest dagoela beste alderdi politikoekin
hitz egiteko.