ATZO arratsaldean pleno berezia izan zen Udaletxean eta bertan hainbat puntu
eztabaidatu zituzten. Horien artean gaur egun indarrean dauden Arau
Subsidiarioak aldatzea. Aldaketa hau Hirigintza Batzordeko proposamen batetik
dator eta lokal komertzialak etxebizitza bilakatzeko araudiarekin du zerikusia.
Udalaren asmoa da Arau Subsidiarioetan aldaketa egin eta modu horretan lokalak
etxebizitza bihurtzeko baimena eskatuko dutenei ´segurtasun juridiko haundiagoa`
ematea, hirigintza zinegotziaren hitzetan. Udal ordezkariek jakinarazi dute
aldaketa honekin datorren urtean hasi daitezkeela baimenak ematen.
Finantza fiskalak aldatzea
Horrez gain, beste puntu batzuk aztertu ziren atzo. 2006ko ordenantza
fiskalak aldatzeko proposamena da horietako bat (%3,2ko igoera izango du, KPIra
ajustatzeko) eta 2004ko aurrekontuen emaitzak onartzea ere eztabaidatu zen
atzoko plenoan.
Bestalde, Plenoak baiezkoa eman dio animaliak edukitzeko eta babesteko
ordenantza hausten denean alkatetzak eskumena izateari, bizkortasun haundiagoz
jokatu ahal izateko. Hain zuzen, ordenantza hori hautsi dutenen kontrako hainbat
zigor erabaki zituen Udal plenoak atzokoan.
Eztabaida
Atzoko plenoan sortu zen eztabaida. BH plataformako kide baten hitza hartu
zuen eta publikoarentzat mikrofonorik ez zegoenez gonbitea luzatu zioten
zinegotziei dagozkien mikrofonoetatik hitz egin zezan, horrela itzultzaileak
itzuli ahalko zuen esandakoa. Irtenbentzioa bukatzean plenoak aurrera jarraitu
zuen eta PSE-EEko kideek alkateari eskatu zioten BHko kidea bueltatu zedila
publikoarentzako eserlekuetara. PSE-EEko kideak esan zuen mikrofonorik ez
zegoenez eta itzultzaileak hala eskatu zuenez gonbidatu zutela BHko kidea
zinegotzien eserlekutik hitz egitera, baina, behin hori bukatuta ez zegokiola
hor egotea. BHko kidea ukatu egin zen hasiera batean eserlekua uztera, baina,
azkenean publikoan eseri zen, eztabaida aldi baten ondoren.
Gobernu Batzarra
Plenoaz gain, gobernu batzarra ere bildu zen atzo Udaletxean eta bertan
erabaki zen, besteak beste, Biteriko zenbait ikastaro eta auzoetan tailerrak
antolatu eta emateko egitaraua aldatzea 2005-2006 ikasturtean.