Ibon Koteronen ‘Airea’ aurtengo Albokari Topaketan

DATORREN asteburuan, urriaren 1 eta 2an, Hamabigarren Albokari Topaketa izango da, eta Hernani, urtero moduan, albokaren etxe bilakatuko da bi egunetan. Albokariek jarriko diote etxeari bizia edo musika. Euskal Herritik etorritako albokari talde ugarik iganderako antolatu diren emanaldietan joko dute eta herriko kaleetan ere ibiliko dira albokaren doinuak txoko guztietara eramaten.

Ibon Koteron albokari haundia Hernanin berriz ere
Dudarik gabe, aurtengo alboka topaketak berezitasun bat badu eta hori da Ibon Koteronek larunbatean eskainiko duen emanaldia. Albokari bilbotarrak bere azken diskoa aurkeztuko du Hernanin eta horretarako saio berezia prestatu du. Ibon Koteronen emanaldia larunbat arratsaldean izango da, 19:00etan, Biteriko areto nagusian. Dohainik da.
Ez da lehenengo aldia Koteron Hernanin izango dela, beste ediziotan ere izan baita Albokari Topaketan parte hartzen, 2003an esaterako.

Igandean, alboka jaia herriko kaleetan
Topaketaren bigarren egunak albokariak eta kalea izango ditu protagonista. Urtero bezala, Euskal Herri guztiko albokari mordoa etorriko da eta kalebueltan ibiliko dira Tilosetako emanaldi nagusiaren aurretik. Bazkari legea Santa Barbara soziedadean egingo dute eta parte hartzaile ez direnek ere bazkaldu ahal izango dute bertan, 12 euroren trukean. Arratsaldean alboka soinua entzungo da berriro Hernaniko kale guztietan, albokariek agur esateko kalejira egingo baitute. Bestalde, goiz osoan zehar albokagile azoka-erakusketa izango da Tilosetan eta bertan, tresna hau egiteko trebetasuna erakutsiko dute albokagileek.
Antolatzaileek adierazi dutenez, laugarren aldia da Topaketak asteburu guztira luzatzen dituztela (lehenago egun bakarreko jaia izaten zen) eta topaketa honekin nahi dutena da Euskal Herriko albokariak elkartzeko aukera izatea eta musika tresna honen inguruko berrikuntzak ezagutzea. Modu berean, jendeari soinu-tresna hau eta bere doinuak gerturatzea ere badute helburu topaketa honekin.