JUAN Manuel Erasunek eta Mikel Aranaldek irabazi zuten atzo Jauregin jokatu
zen bikotekako norgehiagoka, Bixente Mitxelena eta Jesus Mari Ormaetxea Urki-ren
aurka. Irabazleek 5.193 kilo ebaki zituzten eta galtzaileek 5.126,5 kilo. 67
kiloko aldea, baina, sailetan berdin ibili ziren. Seina sail ebaki zituzten eta
azkenekoan maila bakarra gehiago ebaki zuten irabazleek.
Parean ordubete osoan
Hasi zirenarekin batera antzeman zitekeen alde haundirik ez zela izango bi
bikoteen artean. Hasieran Erasun eta Aranalde aurreratu ziren baina, Mitxelenak
eta Urkik inork uste ez zuela, lehenago bota zuten 4garren saila. Erasunek eta
Aranaldek pixkanaka terrenoa jan zieten Mitxelena eta Urkiri eta seigarren saila
lehenago bukatu zuten. Zazpigarrenean erdiak moztu zituztenean bete zen segan
aritzeko zuten ordubetea.
Txanda librean zen norgehiagoka eta Erasun eta Aranalde maila erdika aritu ziren
elkarri erreleboa ematen; Mitxelenak eta Urkik batzutan hiru txandatan moztu
zuten maila.
Belarra bustita
Goizeko euriak blai egin zituen atzo Jauregiko sailak eta belarrak pixu
haundia hartu zuen. Belar pixua izanda edozeinek irabazi zezakeela ikusten zen,
lana txukun xamar egin ezkero behintzat.
Irabazleek Kronikari adierazitakoaren arabera, belarra bustita zegoen eta horrek
lana konplikatu eta zakartu egin zien pixka bat. Aranalde: ´sega kolpea moteldu
egiten da eta belarra segari erantsi egiten zaio`.
Penalizazioak
Kiloak kendu ere egin zituzten atzo epaileek, penalizazio lege berria
aplikatuta. Txukun mozten ez duenari txartel gorriak ateratzen dizkiote eta
txartel bakoitzagatik 20 kilo kentzen dizkiete. Irabazleek hiru txartel gorri
(60 kilo) ikusi zituzten eta galtzaileek bi (40 kilo).
Irabazleak gustora
Bi irabazleak gustora aritu ziren atzo segan elkarrekin, eta biek
azpimarratu zuten lagunaren lana. Erasun: ´bizi egin beharreko lana da txanda
librekoa eta ondo moldatu gara horretan`.