HAMAIKAGARREN urtez Sagar eta Sagardoaren eguna egingo da gaur Hernanin,
Tolarea Sagardo Naturalaren Kofradiak antolatuta. Festak urteroko egitarauari
eutsiko dio, eta antolatzaileek espero dute urteroko arrakasta izatea.
Eguraldiak trabarik jarri ez duenean behintzat, jendetza haundiak biltzen dituen
festa izan da azken urteetan.
Sagardoa 11:00etatik aurrera
Goizean goiz hasiko da gaur jaia. 09:00etan trikitilari eta txistulariek
girotuko dute eguna. 10:30etatik aurrera, sagar erakusketa eta sagarrarekin
egindako produktuena jarriko dute martxan. Hernanitik Manu Iradi eta Mari Karmen
Urangak jarriko dituzte beren sagar erakusketa eta produktuak. Gainerako
sagarrak, Diputazioak jarriko ditu.
11:00etan hasiko da sagardo probaketa. Gaur egunean herrian martxan dauden
hamaika sagardotegietako sagardoa probatzeko aukera izango da plazan: Otsuaenea,
Elorrabi, Zelaia, Altzueta, Itxasburu, Goiko Lastaola, Larre-Gain, Rufino,
Alberro, Iparragirre eta Olaizola.
Sagardo berria edo zizarra nola egiten den ikusi eta edateko aukera ere izango
du jendeak. Zizarra aurreneko sagarrarekin egindako muztioa izaten da eta,
urtero bezala, Barkaiztegik egingo du plazan.
Kixkiarekin sagar biltzea eta tresna zaharren erakusketa ere ez dira faltako
aurten. Horretaz gain, Iparragirrekoak urtero egiten du gauza bereziren bat, eta
gaurko ere prestatu du sorpresa.