ASTIGARRAGAKO Bereziartua sagardotegia izan da aurtengo Txantxangorriko
sagardo lehiaketako txapelduna. Bigarren Astigarragako Irigoien izan da,
hirugarren Hernaniko Otsua-enea eta laugarren Donostiako Barkaiztegi.
Giro polita izan zen ostegunean Txantxangorriko lorategian. Bertan bildu ziren
156 probatzaile, 15 sagardotegitako sagardoen artean onenak aukeratzeko. Afari
bapoa izan zuten, bakailua, sahieskia eta postrea, kafea, kopa eta puruarekin.
Janari bultza egiteko sagardoa izan zuten lagun.
Emaitzak bertsotan
Afalondoan hasi zen sariak emateko ekitaldia, lorategian bertan. Gaueko
11:30etan lehiaketako antolatzaileek hitz batzuk egin eta Garin eta Aterpe
bertsolariek agur bana kantatu zuten. Bertsolariek ez zuten beraien lana hor
bukatu, izan ere, ohitura den beraz bertsotan esan zituzten sarituen izenak,
laugarrenetik hasi eta txapelduna arte. Aterpek honela jakinarazi zuen
irabazlearen izena: ´Bi ordu ta’erdi pasa ditugu, pozik jan eta edanda/ta gaur
hemengo irabazlea/Bereziartua izan da.`
Bereziartuak 1.176 puntu lortu zituen, Irigoienek 1.163, Otsua-eneak 1.153 eta
Barkaiztegik 1.147 puntu. Guztiek trofeo bana irabazi zuten eta Bereziartuak
txapela ere bai.
Zazpigarren mahaia irabazle probatzaileen artean
Sagardotegiez gain, probatzaileek ere izan zituzten sariak. Puntuazio
xuxenena ateratako mahaiak eraman zuen saria eta zazpigarren mahaia suertatu zen
irabazle. Mahaiko kide bakoitzak opari bana jaso zuen ordainetan.