Bertsotan egin nahi duten gazteentzat bihar hasiko da ikastaroa Biterin

HERNANI bertsoaren kabi dela esan izan da eta kabi horretako parte izan nahi duten gazteek ostiralero ordu bete izango dute horretarako, 17:00etatik 18:00etara. Bihar izango da ikasturteko lehenengo klasea, bai iaz bertso eskolan ibili zirenentzat eta baita aurten animatzen diren berrientzat ere. Bertso klaseak 18 urtez azpiko gazte guztientzat izaten dira eta irakasle aritzen dira eskarmentu dezentea duten bertso eskolako bertsolariak. Zita, Biteri aurreko plazan egingo dute, arratsaldeko 17:00etan.

Ondo paseaz ikasi
Bertsotan jolas bidez erakusten dute Hernaniko Bertso Eskolan, Estitxu Eizagirre irakasleetako batek Kronikari esan dionez. Hasi ordurako jendea kantuan jartzeko joko eta moduak bilatuak dituzte eta ´hizketan dakiten guztientzat` dago tokia. ´Jolas bidez pixkanaka bertsotan erakusten saiatzen gara eta molde horretan denontzako dago tokia, ausartak nahiz lotsatiak izan` irakaslearen hitzetan.

Barruan duguna ateratzeko
Bertsoa, hitzaren jolas izateaz gain, gazteek barruan dutena atera eta sortzeko erreminta oso garrantzitsua da Eizagirreren hitzetan: ´erakutsi, erakutsi liteke, baina, gero norberak barruan duena ateratzeko balioko dio bertsoak, bere bidea egiteko`. Iaz 15 gazte aritu ziren Hernaniko bertso eskolan.

Ekitaldi bereziak
Asteroko klaseaz gain, bertso eskolako kideentzat izaten dira zenbait zita berezi eta aurtengo kurtsoan ere izango dira, animatzen direnentzat: Aste Santuan irteerak, Eskolarteko Txapelketa, udalekuak, bertso saio bereziak, ikastetxeetan bertso saioak eta abar.