BERRIAK elkarteak sariak banatzen ditu, Berriak-eko bazkide diren dendetan
erosketak egin eta puntuak akumulatuta. Horretarako Berriak Txartela egin behar
da eta erosketa bakoitzean puntuak ematen dira, eskura edo txartelarekin
ordainduta.
Lehenengo saritua Bixente Goñi hernaniarra izan da. Urdaiazpikoa irabazteko
beharrezkoak diren 500 puntuak osatu ditu Goñik eta atzo arratsaldean jaso zuen
bere saria Alkorta harategian Mikel Alkortaren eskutik; gustora ikusten zitzaion
saria eskuetan zuela. Urdai azpikoaz gain, sari asko daude aukeran Berriak-eko
puntuak irabazita: ardoak, kafea, kafetera, motxilak...
Erantzun ona
Berriak elkarteko kideek Kronikari esan diotenez erantzun ona izan du
txartelak eta jendeak erabiltzen du. Guztira 400 bat lagunek badute txartela eta
beste norbaitek egin nahi badu ere badu aukera. Debaldekoa da eta 300 puntu
erregalo izango ditu txartela egiten duenak.