GAUR jarriko da indarrean Bide Segurtasun Legeari Espainiako Gobernuak egin
dizkion azken aldaketak. Aldaketa hauek puntuetako gidabaimenarekin daude lotuta
baina lege osoa datorren urtean jarriko dute martxan, seguraski. Gaurtik aurrera
indarrean jarriko dituzten aldaketen ondorioa izango da arau-hausteak
larriagotzat jotzea eta hauei dagozkien zigorrak gogorragoak izatea.
Aldaketak
Lege honek aldaketak ekarri ditu, esate baterako, isunak ordaintzerako
garaian. Isuna 30 eguneko epean ordaindu ezkero %30 gutxiago ordaindu beharko
da. Gidabaimena kentzekotan, gutxienez hilabetez kenduko dute. Arau- hausteren
bat egin duen gidariak identifikatu nahi ez balu, arau berriarekin, arau-hauste
larria izango da. Motorrean atzean doanak kaskoa ez badarama gidariari jarriko
zaio isuna, ez bidaiariari orain arte bezala.
Arau-hausteen kalifikazioa
Lege berriarekin arau-hausteen kalifikazioa gogortu egingo da. Lehen arinak
ziren arau-hauste batzuk orain larriak izango dira eta lehen larriak ziren beste
arau-hauste batzuk orain oso larriak izango dira.
Orain arau-hauste larriak izango dira: gidatzerakoan arreta eragozten duen
edozein gauza erabiltzea; ITVa pasa ez duen kotxea erabiltzea; zinturoia lotuta
ez eramatea; umeak eraman ahal izateko sistemarik ez erabiltzea eta karneta
kadukatuarekin gidatzea. Arau-hauste oso larriak izango dira adibidez, karnetik
gabe gidatzea, matrikula gabe gidatzea edo baimenik izan gabe autobia eta
autopistetan gidatzea.