TRIATLONEKO distantzia luzeko Munduko Txapelketa gaur egingo da Danimarkako
Fredericia hirian. Hernaniarrek badute beren ordezkaria, Xabat Aizpiolea bertan
izango baita.
Aizpioleak Kronikari esan dioenez, Atletico S.S-tik joan dira bera eta beste bi
lagun, Tolosako Egoitz eta Donostiako Imanol. Guztira 154 kilometro egin beharko
dituzte: Lehenengo 4 kilometroak igeritan, beste 120 kilometro bizikletan eta
azkeneko 30 kilometroak korrika.
Ibilbide luzea baina laua
Ibilbidea gogorra den galdetuta hernaniarrak zera esan du: ´Gogorra da
distantziagatik, baina bestela nahiko laua da, bai korrika eta baita bizikletan
ere`. Igeritan egin beharreko kilometroak itsasoan egingo dituzte, Fredericia
kostaldean baitago. Bertako ura 17,5Cº-tara zegoen ostiralean (atlantikoan
23Cº-tan izan da egunotan), beraz ez dute udako ur epelik somatuko lasterketako
partaideek
Hiru euskaldunak joan den astetik daude Danimarkan ´opor moduan ere etorri gara`
dio Aizpioleak, baina aitortzen du gogoa duela lasterketa egiteko, martxotik ari
baitira txapelketa hau prestatzen: ´nire helburua lasterketa bukatzea da, nahiko
nekatuta gaude dagoeneko`, dio.
Txapelketaren antolaketa aldetik ez du inolako kejarik, alderantziz, ikusi
dutenaren arabera oso ondo dagoela dio eta lasterketaz gain, ekitaldi pilo bat
ere antolatu dituztela. Festa haundia izango da beraz Fredericia hirian.
Ziklismotik triatlonera
Xabat Aizpioleak ziklismoa egiten zuen lehenago, baina gero duatlonak eta
triatlonak egitera pasa zen. Bera eta bere bi kideek jadanik badaramazkite sei
urte lasterketak egiten, baina aurten da lehenengo aldia triatlon bat egitera
kanpora dijoaztela.