SAN Joanen ondorengo egunetan grabatu zuten Jesus Ponce zuzendariak eta bere
taldeak Desviados izeneko filmearen Hernaniko eszena. Uztaila bukatzearekin
batera amaitu da errodajea ere eta hurrengo urteko udaberrirako zinema aretoetan
egongo da.
Kixkalekoek Kronikari azaldu diotenez, Hernanin grabatutako eszenan tabernako
bezero batek barraren bestaldean dagoen zerbitzariarekin ligatzeko egingo duen
saiakera azalduko da. Lortuko duen edo ez jakiteko pelikula ikustea beste
erremediorik ez da izango.
Hamar orduan eszena bat
Tabernakoek esan dutenez, lekua ia kasualitatez aukeratu zuen zuzendariak,
bertatik pasa eta aproposa iruditu zitzaiolako. Ekainaren 29an etorri zen
filmeko ekipoa Hernanira, San Joanak bukatzean Kixkal bi egunez itxita egon zela
aprobetxatuz. Errodajea dezente luzatu zen, arratsaldeko 19:00etan sartu
baitziren tabernara eta goizeko 05:00ak arte ez zuten bukatu. Hamar ordu eszena
bakarra grabatzeko. Pelikula osoaren errodajeak berriz, zazpi aste iraun du eta
Gipuzkoan grabatu dute oso-osorik, Hernaniz gain Aia, Orio eta Donostian.
Thriller azkarra
Thriller bat da Desviados, erritmo bizian kontatua eta tentsioz betea. Jesus
Ponce zuzendariak filmearekin salatu nahi izan du gaur egungo gizartean dirua
eta arrakasta lortzeko jendeak duen obsesioa. Ponceren bigarren lana izango da
hau, 15 días contigo-ren ondoren. Parte hartuko duten aktoreen artean berriz
ezagunenak dira: Eloy Azorín (Todo sobre mi madre eta Juana la loca bezalako
pelikuletan aritua) eta Oscar Jaenada (Noviembre, El juego de la verdad eta
beste hainbat pelikulatan protagonista izandakoa).
Maitasuna, bahiketak eta burdinola bat
Desviados-en kontatzen den istorioak sinplea ematen du hasieran baina
pelikula aurrera dijoan neurrian korapilatzen hasten da.
Gorka (Eloy Azorínen pertsonaia) Susanarekin ligatu nahiean ibiliko da pelikula
honetan, eta horretarako ez hanka eta ez buru ez duen plan bat prestatuko du.
Iban (Oscar Jaenada) kontratatuko du neska bahitzera dijoanaren itxurak egin
ditzan, ondoren berak salbatu eta Susana bereganatzeko. Gauzak gaizki aterako
dira ordea, eta neska bahitu egingo dute bien artean. Gainera ihesean dijoazela
auto istripu bat izango dute eta basoan galduko dira.
Horrela iritsiko dira Luis izeneko artista batek burdinola zahar batean daukan
eskultura tailerrera. Luis ez dago bakarrik ordea: izaki ikustezin bat bizi da
burdinola zaharrean eta iritsi berriak diren gazteen atzetik ibiliko da.
Istorioa oraindik gehiago nahasteko, burdinola horretan bertan norbait erail
egin zutela jakingo da beranduago, oso modu odoltsuan gainera.
Bainet Zinema ekoiztetxearen lana
Airbag famatua ekoiztu zuen etxe berak egin ditu produkzio lanak
Desviados-en ere. Dagoeneko bost pelikulatan parte hartu du Bainetek eta
arrakasta haundia izan dute, bai kritikaren aldetik baita publikoaren aldetik
ere.