Gobernu batzarrak dio proiektua erretiratzea ´debatea hankaz gora botatzea` litzatekeela

Gobernu Batzarrak prentsaurrekoa eman zuen atzo ´talde zenbaitek, ezker abertzalearen ingurukoak gehienak` Hernaniko arau subsidioarioen proiektu proposamenaren aurrean egindako adierazpenen inguruan. Udalbatzako taldeak Zenbait puntutan laburbildu du bere ikuspuntua Gobernu Batzarrak: 1) Udalbatza osatzen duten alderdi guztiak (EA, PNV, PSE, EB eta PP), Arau Subsidiarioen egitasmoaren tramitazioa hastearekin ados daude, ´hau da, ia hernaniarren %70aren ordezkari diren alderdi hauen guztien babesari esker herriaren etorkizun urbanistikoari buruzko eztabaida prozesua hastea erabaki zen`, nabarmendu dute. Beren hitzetan horrek ez du esan nahi Udalean dauden talde politikoek dokumentua osorik bere egiten dutenik baina ´Hernanik datorren 10 edo 15 urteetan nolakoa izan beharko duen erabakitzeko orduan gizarte eragile, politiko eta ekonomikoen eta herritar guztien parte hartzearen aldeko apustua` egiten dutela esan dute. 2) Arauen tramitazioak ´adostasunaren eta eztabaidaren aldeko apustu garbia` egiten duela azpimarratu dute. Dokumentua bertan behera uzteko zenbait taldek egindako eskariaren aurrean Gobernu Batzarrak dio eztabaida bertan behera uztea litzatekeela. Eta araurik gabe ´aldian-aldiko gobernatzaileei hirigintza nahi erara antolatzen` uzten zaiela uste dute. 3) Gaurko gobernuak ´etxebizitza merkatuan eragiteko apustua` egiten duela diote ´etxebizitza babestuen aldeko politika aktibo bat bultzatuz, zeinen bidez etxebizitza berrien erdiak, gutxienez, babes mailaren bat izan behar baitute`. Herria biziberritzearen alde (AMR eta inguruko enpresak Floridatik aterata) eta auzoetara bideak berritzearen alde ere egiten dutela esan zuten atzo. Parte hartzeko deia Gobernu batzarreko kideek jakitera eman dute ´klase eta maila guztietako jendea eta joera politiko guzti-guztietakoa` ari dela beren ekarpenak aurkezten. Horren bueltan esan dute ´aurkeztutako alegazio guztiak, salbuespenik gabe` ari direla banaka banaka aztertzen eta nabarmendu dute ´ziur aski horietako asko eta asko` onartuko direla, ´Hernani berriaren garapen orekatu eta harmonikoa lortzearren testu berri integratzaile bat osatzeko`. Une hauetan ´dena irekia` dagoela esan du gobernu batzarrak ´eztabaidaren ondorioz aldaketak egiteko`. Arau subsidiarioen proiektua Biterin dago ikusgai eta uztailaren 18 arte aurkeztu litezke alegazioak. Gobernu batzarra: ´Debate hau ez da eman 12 bat urtean` Atzoko prentsaurrekoan Joxan Rekondo alkateak esan zuen badirela 12 urte Hernanin marko urbanistikoaren inguruko debaterik izan ez dela. ´Aurreko legegintzaldian ere debatea hasi zitekeen eta erreferenduma egin, baina, Gobernu taldeak ez zuen garrantzitsua ikusi. Guk uste dugu debatea izatea garrantzitsua dela` azpimarratu du.