LARUNBATEAN hip-hop kulturaz gozatzeko aukera izango du Tilosetara joaten denak. Bertan jaialdia antolatu dute, hip-hopa osatzen duten dantza, musika eta pentsaera uztartzeko.
Jaialdia antolatzen aritu da Aritz Usandizaga hernaniarra (Selektah kolektiboko Aritz Sound Sistem). Berak, Kronikari adierazi dio jaialdi honekin nahi dutela ´jendeari hip-hoparen mundua zer den erakutsi`.
Hip-hop-aren espresio
ezberdinak
Hip-hop-a AEBko auzo pobreetan sortutako kultura da eta bere barruan espresio ezberdinak biltzen ditu: ´Scratch izenekoa da binilo eta platoekin musika egitea` dio Aritz-ek, ´musika sortzeko tresna bihurtzen dira eta ez bakarrik musika jartzeko`. Break dantzari buruz ere hitz egin digu Selektah-koak eta dioenez, espresio korporala lantzen da bertan.
Horretaz gain, graffitiak eta skate edo rollerra ere hip-hop kulturaren barne dira.
Jaialdia Tilosetan
Larunbaterako antolatu duten jaialdia egun osokoa izango da. Goizeko 11:00etan hasita graffiti, scratch eta break dantza tailerrak egingo dituzte Tilosetan. Graffitiak egiteko panelak jarriko dituzte eta gero ikusgai egongo dira. Tailerrak monitoreek lagunduta egingo dira: Donostiako Intxaur Break, taldea break dantza tailerrean; Selektah-ko Zigor, scratch tailerrean; eta Iñaki, graffitienean.
Eguerdian atsedenaldi bat egingo dute bazkaltzeko, baina musika ez da geldituko. Arratsaldeko 17:00ak aldera jaialdiak jarraituko du rap abeslariekin. Aritz Usandizagak Kronikari adierazi dioenez zaletasun haundia dago gazteen artean eta asmoa da ´gazte horiei aukera bat ematea, rap-a kondizio egokietan abesteko`, dio. Gutxi gorabehera 10-15 abeslari izango dira, horietatik hiru hernaniarrak. Horretaz gain, Euskal Herri osotik etorritako break dantzarien erakustaldia ere egongo da eta frontoian skate pista bat jarriko dute.
´Momentuko beharra`
Jaialdiak edizio gehiago izango ote dituen galdetuta, Usandizagak Kronikari esan dio jaialdia ´momentu honetan dagoen behar bati erantzuteko` antolatu duela, baina ez du alboratzen segida izango duenik. Jaialdia Udalaren laguntzarekin antolatu da.