´Herritarren eskaria argia izan da: ilegalizazioak bukatu egin behar du`

BILDU Hernanik Kronikara bidalitako idatzi baten bidez hauteskundeen inguruko balorazioa azaldu nahi izan du. Bildu Hernanik azpimarratu du hauteskundetako emaitzek ´ilegalizazio politikaren porrota` suposatzen duela eta diote herritarren eskaera argia izan dela: ´ilegalizazioen ondorioekin amaitu behar da bai Gasteiz, bai udaletan, bai Nafarroan, bai foru aldundietan` azaltzen dute. ‘Ezker Abertzalearen garaipena’ Bildu Hernanik dio pozik dagoela Ezker Abertzaleak, EHAK alderdian bilduta, lortutako emaitzekin: ´berriz ere nabarmen geratu da ezker abertzalearen garrantzia Euskal Herriko gizartean, eta egoera txarrenean ere herri honek argi utzi du ezin direla hemengo arazo politikoak konpondu ezker abertzalearekin kontatu gabe` diote. Ilegalizazioaren aurka urratsak eman Bildu Hernanik Joxan Rekondo, Alkateari; EAJ-EA eta Ezker Batua taldeei eskatzen die ´jarrera aldaketa`. Diotenez, ezker abertzalearen partehartzea bermatu gabe udala gestionatzea ezinezkoa izan behar luke. Horrekin batera diote ´Rekondo eta bere taldekideak BHren ilegalizazioaz baliatu dira gure herria gobernatzeko`. Bildu Hernanik dio egoera hau gainditzeko behin eta berriz aurkeztu dituela proposamenak: ´badaude moduak, Lizartzako eredua jarraituz, Hernaniko herriak aukeratu zituen zinegotziak udalean izateko` azaldu dute. Diote ezezkoak jaso dituztela proposamen hauen aurrean eta ´ezezkoaren politika amaitzeko eta ilegazazioaren aurka urratsa zehatzak emateko` eskatzen diote udalari.