PSE-EE: ``Positiboa da Arau Subsidiarioak berrazter

Hernaniko Udal Talde Sozialistak, PSE-EEk, Arau Subsidiarioen inguruko bere balorazioa helarazi dio Hernaniko Kronikari. Alderdi Sozialistaren iritziz beharrezkoa zen berraztertzea antolaketa urbanistikorako dokumentu hau ``gaur egungoa, 1994tik indarrean zegoena, agortuta baitago``. PSE-EEk dio, joan den martxoaren 10ean udalak onartu zuen behin behineko dokumentu hau izan dela ``udal ordezkaritza duten talde ezberdinen arteko eztabaida bizi eta eraikitzaile baten ondorioa`` eta sozialisten hitzetan, ``arauen berrazterketa zein modutan egiten ari den oso positiboki baloratzen dugu``. Udal talde honek gaineratu du, aurkeztu diren alegazioak Arau berrietan sartu eta gero Arau Subsidiario hauek ``hernaniarren gehiengoa`` ordezkatuko dutela. Babes ofizialeko etxeak Hernaniko PSE-EEko udal taldeak garrantzia eman nahi izan dio babes ofizialeko etxeen kopurua ``asko igoko`` dela, eta hori ``sozialisten proposamenei esker`` izango dela esan du. Igoera hau, batez ere urbanizatu daitezkeen lurretan emango da PSE-EEren iritziz: ``Portu-Karabel ingurukoa da adierazgarriena, hor eraikiko diren etxeen %65 babestuak izango dira eta``, diote. Txillida-Leku museoa eta Zabalaga inguruneari buruz talde sozialistak esan du ``gure udalerrian turismoa eta kultura garatzeko giltza da eta gainera, natura eta paisaiarentzako balio garrantzitsua dauka``. Horregatik, sozialistek esan dute beraien ekarpenak bideratu dituztela ikerketa sakon bat egin dadin Galarretan: ``hirugarren sektoreko zerbitzu eta erabilerarako inguru bat sortzeko``, Zabalaga ingurunearen osagarri bezala. Interes publiko eta orokorraren alde Talde sozialistak adierazi duenez, beraien proposamen guztietan ``interes publikoak eta orokorrak`` izan dituzte kontuan: ``partikularren eta pribatuen gainetik``. Horretaz gain kontuan izan dituzte: ``hiritar guztien bizitza kalitatea, alderdikeriaren eta espekulazioaren gainetik, eta hirigintzaren garapen jasangarri bat, baina jakingo duena etxebizitzan, zerbitzuetan, komunikabideetan eta ekipamenduan dagoen eskariari aurren egiten``. Bukatzeko, Hernaniko Udal Talde Sozialistak esan du konpromisoa hartzen duela aurkeztuko diren alegazio guztiak aztertzeko, eta defendatzeko arrazoizkoak iruditzen zaizkionak: ``datozen lekutik datozela, beti ere bideratuko badira sortzera Hernani ireki, moderno eta ingurugiroan integratu bat. Azken finean hernaniar guztien mesedetako izango dena``, azpimarratu dute.