Udalak dio BHk lokalen ordenantzaren tramitazioa ``korapilatu`` nahi duela

Lokalak etxebizitza bihurtzeko ordenantza dela eta, Bildu Hernanik Udalari egin dizkion kritikei erantzun die Iñaki Arratibelek, Hirigintza Zinegotziak. Zinegotziak Hernaniko Kronikari pasatako prentsa ohar batean dio ordenantzak ``oso harrera ona`` izan duela Hernanin eta hiritar askok beren babesa eman diela: ``ekimen honen helburu baitira etxebizitzen prezioak merketzea eta abandonatuta dauden lokalek eragiten duten degradazioa desagerraraztea``. Tramitazioa ``korapilatu`` Bildu Hernanik aurkeztutako alegazioen inguruan, Iñaki Arratibelen hitzetan ``aurkeztutako alegazioak, Bildu Hernanirena barne, oso interesgarriak direla deritzogu eta ordenantza aberasteko arreta handiz irakurriko eta aztertuko ditugu``. Dena den, Udala ez dago ados Bildu Hernanik lokalen ordenantza berriaren aurrean agertu duen jarrerarekin, bere ustez, ordenantzaren tramitazioa ``korapilatu`` nahi baitu BHk eta honek ordenantzaren behin betiko onespena atzeratu egingo luke ``hiritar askok denbora gehiago itxaron beharko dute hainbeste behar duten etxebizitza lortzeko``. ‘Per sekula sekulorum’ Hirigintza sailetik pasatako oharrean adierazten da BHk eta beste alderdi batzuek aurkeztutako zenbait ideia erantsiko zaizkiola lokalen ordenantzari ``gure proposamena hobetu daitekeela ez dugu dudarik`` dio Arratibelek, baina modu berean azaltzen du ``ez dugu onartuko per sekula sekulorum atzeratzea begibistakoa den arazo larri baten konponketa``.