Ikatza Liburugunea

( Aiora, Kattalin, Ainara, Lore eta Alberto Gil Mosquera Ikatza Liburugunearen izenean ) Dagoeneko jakingo duzuenez, Ikatza Liburugunea orain dela bi urte sortu zen. Harrezkero, hainbat ekintza, dinamika eta proiektu eraman ditugu aurre­ra: hitzaldiak, zikloak, erakusketak, proiekzioak, li­bu­ruen aurkezpenak… Hasie­ra­tik oso gai ezberdinak (militantzia politikoa, feminismoa, kartzela, borroka armatua, autogestioa…) jorratu ditugu, ber­tan hainbat lagunek eta kolektibok parte hartu eta ikuspuntu kritiko eta zabala plazaratu dute. Era berean, ha­sieratik egin genuen kultura herrikoia zabaltzeko apustua. Orain berriz, gure etorkizuna airean dago. Karbonera desalojo arriskuan dago prozesu judizial bat martxan dagoelako. Egoera honen aurrean, gune abandonatuen okupazioaren eta erabileraren egiten dugu ohiu. Helburuak bat baino gehiago dira: gure kasuan bezala, gune kultural-politiko-soziala sortzeko, baita hain premiazko den etxebizi­tza beharra asetzeko ere. Bide batez, Ikatza kolektiboak Kar­bone­ra­ko biztanleei besarkada solidarioa bidaltzen die! Gure helburua, besteak beste, leku-gune-esparru as­ko­tan jorratzen ez diren gaiak eta ikuspuntu interesgarriak bultzatzea da. Era honetan oso publiko zabalak hartzen du parte antolatzen ditugun ekintzetan. Aldi berean, urteetan abandonatuta egon den espazio bati bizia ematen diogu topaleku bihurtuta. Aurrera eramaten dugun lan honekin oso gustura sentitzen gara eta gure dinamika mantendu nahi dugu, nahiz eta epaileek edo jabeek kontrakoa nahiago izan. Beraien iritziak gure gogoak, motibazioak eta ametsak baino gehiago balio dute? Guk ezetz diogu. Honengatik guztiagatik, denuntzia kentzea eta prozesu judiziala bertan behera uztea exigitzen dugu. Karbonera eta Ikatza Liburugunea defendatzeko ekintza asko daude martxan. Adi eta parte hartu! Gora kultura herrikoia!