( Joxe Elizondo Arruti ‘Niko’ ) Zerk dauka garrantzia / Zerk ez
Joan den igandean Hernanin drama bat gertatu zen (Rosario Roman hil zuten, muturrera eramandako indarkeria matxistaren ondorioz). Drama horren aurrean, gertaera horiek salatu eta baztertzeko Hernaniko herriak izan duen erantzun on eta jendetsuaren ondoren, erabat lekuz kanpo daude komentario eta zurrumurru garrantzi gabekoak (adibidez, afektatuei buruzko juizioak egitea bizi den moduagatik, jaio den lekuagatik, edo bestelako kontu hutsal edo garrantziarik gabekoengatik).
Nire ustez, atentzioa beste leku batzuetan jarri beharko genuke: jarri ditzagun bideak, orain eta hemen, gizonezko batzuk pentsatu ez dezaten, emakumea beraiena denik, beraien objetu bat. Erabateko gaitzespena beste pertsona batzuen bizitza erabiltzeari. Jarraitu beharra dago gizarte eta erlazio berdintasunezkoak bultzatzen, erlazio ez zanpatzaileak. Indartu emakumeen autoestima eta independentzia. Biktimei laguntza eman eta tratu txarren kontra (gehienetan gizonen aldetikoak) borrokatzea.
Salaketez gain, baina hauen garrantzia ukatu gabe, badira beste lan batzuk lehen maila hartu beharko luketenak, praktika zentzugabe hauen aurka aurrera egiteko: heziketa, berdintasunaren eta tratu onen alde. Neurri prebentiboak, emakumeei babesa eta segurtasuna emateko. Bizitzeko baliabide propioak garantizatzea. Gaitzespen sozial eta pertsonala zabaltzea, erasoen aurrean eta dominaziozko harremanen aurrean. Gatazkak bideratzeko indarkeriarik ez eralbiltzea... Azken batean, askatasun indibidual zein kolektibo handiagoa eta giza harreman eta afektiboak hobeak izango diren etorkizuna irekitzen joatea..
Neska eta mutilok ez duzue goardia jaitsi behar. Azken hamarkadetan asko aurreratu den arren, atzera egiteko arriskua dago eta oraindik zer egin haundia gelditzen da. Zuen esku dago...
Eta azkenik, lehenengo egin beharrekoa izan behar lukeen arren, Rosarioren familiakoei eskerrak eman eta nire maitasuna adierazi nahi diet une gogor hauetan azaldu duten jarrera bikainagatik, baita Chaib Azzouziren (marokoar jatorrikoa, egia esateko) jarrera ausarta eta arriskatua aitortu ere erasotzaileari aurre egiteagatik.