Nahikoa da! Emakume bakar bat gehiago ere ez!

( Ana Revuelta Andres Garazi Jauregi Carrera Nahia Eguskizaga Bilbao Hernaniko Txoko Feministako kideak ) Azken hilabeteek indarkeria sexistaren zantzu garbiak utzi dizkigute Euskal He­rriko txokoetan, Burlatan Ya­nela, Durangon Jone, Por­tugaleten beste emakume bat eta bere haurra izan dira erailak. Eta atzo Hernanin, Ro­sario erail zuen bere bikotekide ohiak, eta honen alaba zauritu. Hemendik elkartasunezko besarkada handi bat Rosarioren alaba eta familiakoei. Gure nahia halako erasoak gehiagotan ez gertatzea da. Eraildako emakumeen zerrenda handitzen doala ikusteak hotzikara ematen du, kezkagarria da eta eraso hauen iraunkortzeak amorruz bete eta NAHIKOA DA! ozen esatera eramaten gaitu, kalean, etxean, lanean, ikastetxean, tabernan, jaietan, ohean, harremanetan. NAHIKOA DA! Izan ere, indarkeria mota hau gure gizartean gertatzen den giza eskubideen urraketa larrienetarikoa eta hedatuenetakoa da. Pa­triarkatuak emakumeon aurkako indarkeria eta sexuen arteko botere harremanak bultzatzen ditu, eta biolen­tzia, gizartean emakumeok jasaten dugun mendekotasuna betikotzeko kontrol mekanismo gisa erabiltzen du. Baina ez dugu inposaketarik onartuko! NAHIKOA DA! Ez dugu eraso sexistak bultzatu, onartu eta iraunkortzen dituen sistemarik onartuko! Horregatik egongo gara gaur 20:00etan Gudarien enparantzan eraso hau salatzeko egingo den gaitzespen ekitaldian, eta bihar, etzi eta hurrengoan ere jendarte eredu parekidea eraikitzeko lanean kalean, etxean, ikastetxean, tabernan, jaietan, lantegietan, ohean, harremanetan. Autodefentsa Femi­nista bultzatzen, jendarte eredu parekidea eraikitzen. Gonbidapen zabal bat: etorri, asko bagara hobe, hau guztion ardura da.