Lau urte oparoak
Zoragarria izan da Bilduren garaipena eta pozgarria oso Udal berriaren osaketa. Giro honetan aurreko legealdian ezker abertzaleko alkate eta zinegotziek egindako lan ikaragarria eskertu nahi nuke. Krisi eta arazo ekonomikoen garai honetan, 2007-2011 legealdiko balantzea ikusgarria da eta hemen hainbat lan gogoratu nahi ditut: - Auzoekin kezkatutako Udala izan dugu eta hor ditugu egindako hobekuntzak: Karabeleko igogailua, Politena parke berria Etxeberrin, La Cumbre, Antziola eta Zikuñagako auzoen urbanizazio berriak, eta Etxeberriko lehen fasea, Ereñotzuko apaiz etxearen egokitzea, Ave Maria parkea… - Euskara eta euskal kultura lehen mailan jarri duen Udala izan dugu. Gure kulturaren pizgarria izango den Kultur Gune berria lehentasunen artean jarri dute; Kultur Etxeko ikastaroetan, antzerki zikloetan euskarako eskaintza areagotu da, Euskal Jaiak berreskuratu dira, Musika ziklo berriak sortu dira… - Etxebizitzari buruz esan, lehen urratsak eman direla alokairuzko udal etxebizitzak lortzeko, orain hiru dira baina laster Txantxillako beste zortziren bat gehituko dira eta AMRko orubean beste dozena bat lortuko dira. Gainera esan, Txantxillako eta AMRko Babes Ofizialeko Etxe guztiak Hernaniko herritarrentzat izatea bermatu dela. Sagastialden berriz, Udalak tramite lanak azkartu ditu eta horrela, ekainaren 29an, 162 etxebizitza zozketatuko dira hernaniarren artean. - Zerbitzu sozialak handitu dira: Eguneko zentroaren plazak handitu dira, etxez etxeko zerbitzua zabaldu eta azkenean, nahiz eta Foru Aldundiak bere konpromiso ekonomiko guztiak bete ez, Zaharren Egoitzaren zabalkundea amaitu da eta bertan 12 etxebizitza tutelatu berri egokitu dira. Lanean aritu zareten ezker abertzaleko alkate eta zinegotziei, eskerrik asko.
Mikel Arrieta Iraola