( Mikel Arrieta Iraola
) Gure ama jostuna zen. Gure etxean ohikoa zen hari matazak aurkitzea, hari solteak, oihalak, jostorratzak… Haurrak ginenean kuriositate handiarekin amari so geratzen ginen: hariak hilbanatu, josi, moztu, neurtu, makinarekin bigarren pasada eman… Hari ñimiñoena ere beharrezkoa zen, puntada bakoitzak bere betebeharra zuen.
Eta horrelakoa da herri baten bizitza, denok gara garrantzitsuak, denok gara ezinbestekoak gure herriaren etorkizuna erabakitzeko. Bakoitzak bere aldetik, akaso, zer edo zer egin dezake; baina indarrak bilduta, elkar hartuta, indarrak areagotu eta ezinezkoa zirudiena halako batean gauzatu egiten da.
Hor dago biltzearen garrantzia eta aberastasuna. Bakoitza hangoa edo hemengoa gara, norberak bere lehentasunak ditu: ama lurra defendatzea, independentzia, Euskal Herria sozialista lortzea, Euskal Herria euskalduna izatea, gizon eta emakume askeen gizartea bermatzea… Herri honetan kolore anitzak ditugu eta denon artean herri honen mataza osatzen dugu. Denon artean egunez egun Euskal Herria osatzen dugu.
Bide horretatik eraikitzen da herria, bide horretatik eraikitzen da Hernani. Horretan datza Bilduren lehen garaipena. Bildu abertzale ezberdinen eta ezkerreko jende anitzaren adostasuna eta elkarlanaren isla delako.
Bigarren garaipena Maiatzaren 6an izan zen eta orduan elkarrekin erantzun genuelako PP eta PSOE garaitu genituen. Bide horretatik jarraituz, denok biltzen bagara maiatzaren 22an berriz irabaziko dugu.
Kronika egunero, euskaraz eta doan jasotzen segi ahal izateko, Kronikakide gehiago behar dira, eta zer esanik ez, proiektu komunikatibo sendo eta profesional bat garatu nahi badugu.
Egin zaitez KronikaKide!