( Jon Alzaga Aizpuru ) Lau urteotan Andoni Amonarraiz makina bat aldiz saiatu da herritarrok leloak bagina bezala lezioak ematen. Kanpainan ere antzera jarraitzen du, baina tartean besteenaz gaizki esaka aritzea promesa faltsuekin atondu du, gauzak argi esan gabe.
Joseba Egibar aldamenean zuela aurkeztu zizkigun bere asmoak EAJren hautagaiak agintaldi berrirako, gure botoa eraman nahian. 5 ardatz dituela esan zuen, bat gastua murriztea eta alkatearen eta zinegotzien soldatak Eudelek proposatutakoa baino % 10 txikiagoa izatea.
Horrela irakurriz gero, benetan aurreztearen alde dagoela dirudi, baina justu kontrakoa adierazten du, alegia egun alkateak kobratzen duena baino %27 gehiago kobratzeko asmoa duela, eta beraz bere lehen erabakien artean bere soldata igotzea izango lukeela alkate izatera iritsiz gero.
Hori horrela esateko ausardiarik ez eta gezurretan ari zaigu. Horren adierazle datuak: egungo alkateak urtean 38.433 euro irabazten ditu, Eudelek proposatzen zuena ia %40 jaitsi baitzuen. Amonarraiz jaunak 52.500 euro inguru irabazteko asmoa du alkatetzara iritsiz gero, alegia Marian Beitialarrangoitiak baino 14.000 euro gehiago urtean.
Garbi dago, Andoni Amonarraizekin Udalak gehiago gastatuko du, ez herritarrei zerbitzua ematen, bere soldata ordaintzen baizik. Hala egin behar duela uste badu sikiera esan dezala garbi, egia ezkutatzen lanik hartu gabe.
Zorionez, herritarrak ez gara inozoak eta badakigu bozka nori eman. Gauzak ondo, Udalak dirua herritarren beharretara bideratzen jarraituko duen alkatea izango du, nik behintzat harentzat botoa.
Kronika egunero, euskaraz eta doan jasotzen segi ahal izateko, Kronikakide gehiago behar dira, eta zer esanik ez, proiektu komunikatibo sendo eta profesional bat garatu nahi badugu.
Egin zaitez KronikaKide!