Ia etxeferuak bota nituen!

( Andoni Amonarraiz Gómez EAJ-PNVko bozeramailea (*Erredakzioan euskeratua) ) Apirilaren 11ko Plenoan, Al­kateak txundituta utzi gintuen bere diskurtsoarekin; loreak, klase guztietakoak, Testu Bateratua idatzi duten teknikoei; loreak, babesa eman dien politikoei... malkoak hortxe-hortxe ibili ni­tuen, zenbaterainoko mai­su-lana egin duten ikusita... eta hara, ia-ia txaloka hasi eta etxeferuak ere bota nituen!! Ezetz, ez sinistu, broma da. Hernaniko Alkatea ez da konturatu, berak egin duena ez dela aparteko gauza; egin duena da, edozein Alkatek egingo lukeena, bere lekuan egonda: alegia, aurreko legegintzaldian idatzitako Arau Subsidiarioen Testu Bate­ra­tua egin. Dokumentu bat egin du, eta bertan biltzen dira honakoak: Gipuzkoako Foru Aldundiak aipatzen dituenak, Lurzoruaren Lege berriak esaten dituenak, eta bide batez, Pisuerga Valla­dolidetik pasatzen dela aprobe­txatuta, Udaleko aholkulariak erantsitako guztiak. Dokumentu hau beste era batekoa izango zen, alkate­tzan beste alderdi batzuk egon balira, seguru. Doku­mentua egin egingo zela ere, seguru. Eta beste batzuk egindako dokumentuan trafiko aldaketa berri hauek ez zirela egingo ere, seguru; ezta La Cum­bre­ko villatxoak ere; ezta Zubipe, Landare eta Karabelgo lasaitasuna ondatuko duen trenbide azpiko tunel berria ere; eta ez lirateke zapalduko hernaniar as­koren eskubideak, kolpean, orain egin den bezala; eta abar; eta abar. Hemen ordea, ez da ezer pasa. Herriko nagusiak dira agin­tzen dutenak. Animo. 33 egun falta dira.