Giza eskubideen aldekoak,
abertzaleak eta ezkertiarrak, maila berean
Lehenik eta behin Aralarren hauteskunde programari buruz galdetu diogu Aintzane Ezenarrori eta berak esan digu oso zaila dela hitz gutxitan dena laburtzea: ``Aralarrek hiru hanka nagusi ditu. Alde batetik giza eskubide guztien aldekoa da. Bestetik ezkerrekoa eta abertzalea. Denak maila berean defendatzen ditugu``.
Aralarrek ezker-eskuin dialektika berreskuratzearen aldeko apustua egin nahi duela adierazi digu zerrenda buruak: ``EAJ-EA oposizio gabe aritu da orain arte, abertzale izateagatik iritsi zaizkie botuak eta guk ezkerreko izateari garrantzi berdina eman nahi diogu``.
Erabakitzeko eskubidea eta
egoera defizitarioa.
Ezenarroren hitzetan: ``Aralarrek ez du nahi EAJ-EA koalizioak PSOErekin erabakitzeko eskubidea jasotzen ez duen beste ezer akordatzerik eta hortan indar egingo dugu``. Bere ustetan hauteskunde hauetan ``erabakitzeko eskubidea`` dago jokoan: ``hauteskudeen ostean negoziazio prozesu bat hasiko dugu 25 urtetan lehenengo aldiz eta guk politikoki eraginkorra izango den akuilu lana egingo dugu hor``.
Kanpaina nola dijoan galdetu diogunean esan digu ``berri on bat`` badagoela: ``Batasunak egon ezin izango badu ere, gizarte sektore horrek bide bat izango du EHAKrekin``, dio. Dena den, Aralarko kideak garbi utzi nahi izan du egoerak ``defizitarioa`` izaten jarraitzen duela.
Aspektu sozialak eta ingurumena
Aralar ez dago ados AHT eta bestelako makroproiektuekin eta horren aurrean: ``ezetz esatea bakarrik nahikoa ez dela pentsatzen dugu eta guk alternatibak aurkeztuko ditugu``, dio Ezenarrok. Legebiltzarrerako hautagaiak beste proposamen batzuk ere aipatu dizkigu: ``Eraikitzen diren etxebizitzen %50 babestuak izatea nahi dugu eta alokairu soziala gehiago bultzatu. Aitasasun eta amatasunagatik ematen diren laguntzak handituko ditugu, oinarrizko gutxieneko errenta 800 eurotara ere igo nahi dugu...``.
Aurreikuspenak
Aralarrek dio indartsu ikusten duela bere burua eta 4 eserleku lortzeko esperantzak dauzka: Araba eta Bizkaian bana eta Gipuzkoan bi eserleku.