Naturarekiko eta herritarrenganako EAJren jarrera. Egunak ez, urteak.

( Josu Arrieta Iraola ) Otsailaren hogeita lauan AHT dela eta, lurrak desjabetzeko ak­ten sinadura oztopatu nahian, Udalaren atea itxi zen, eta baita Uda­letxean, AHT­re­n aurka zenbait pankarta jarri ere. Kan­poan, AHTren aur­ka eta desjabetuekin elkartasuna adieraziz zenbait lagun bildu zen. Jakina, Hernaniko EAJ­ren ordezkariari, Andoni Amona­rraizi ez zitzaion gustatu, eta zenbait kexu azalduz, idatzi bat: ´Be­netan, zerbait aldatzen ari dela?` (Kronika 2011, Ots. 26) prentsara bidali zuen. Udaletxeko ateak itxi zirela eta, ´Berdin jokatuko al zuten ekintza hori ´AHTaren alde gaudenok` egin izan bagenu?` galde­tzen du, jakingo ez balu bezala, urteetan zehar, AHT­ri bu­ruz edozein informazioa lortzeko, hitz egiteko eta eztabaida­tzeko instituzio eta erakunde publiko guztien ateak itxiak egon direla. Andoni Udaletxean jarritako pan­kartaz kexa­tzen da. Ez zi­tzaizkion gustatu. AHTa egiteko, Her­na­nin, txikituko di­ren lur sailak eta mendiak, desagertuko den herri honetako kultur eta his­to­ria, An­do­niri ez zaio axola. Ezta zuzenean kaltetu diren lagunen sentimenduak ere, ez zaizkio interesatzen. Pankarta inozenteak bai ordea. Hernaniko EAJko ordezkaria kexu azaltzen da, baita ere, protesta ekintza geldiarazteko Uda­lak neurriak hartu ez zituelako, eta gainera manifestari bake­tsuentzat zigorra eskatzen du. Agian kolpatu, atxilotu, torturatu eta tirokatu egin beharko zituzketen. Idatziaren amaieran, An­do­nik dio orain desjabetuek si­na­tzera Gasteizera joan beharko dutela, eta ironiaz: ´Horrela, Hernaniko Udale­txean agin­tzen dutenek herriaren interesen alde egiten dute` idazten du. Gustu txarreko burla, edo EAJren betiko ma­nera: Izo­rratu bai, ondo izorratuko zaituztegu, baina la­sai, ohea hurbil jarriko dizuegu. Lapu­rreta non si­natu behar den, hori da (´beren etxetik 10 minututara…`) An­do­nik des­ja­betuen­ga­nako era­kusten duen arreta bakarra. Idatzi guztian, afektatuenganako ulerkuntzazko edo erru­kizko aipamenik ez dago. Ezta naturaren txikizioaz ere, ez du ezer aipatzen. Amaieran 86 egun falta direla esaten du. Mezua ez dut entenditzen, baina, EAJk eta jel­tzaleek naturarekiko eta he­rritarrenganako duten jarrera al­datzeko, egunak ez, urteak be­harko dituztela pentsatzen dut.