Gehiegitan zuzendu behar izan dizkiogu gobernu taldetik Jose Ramon Chica PSEko zinegotziari soldaten inguruan zabaldutako gezurrak eta udal eztabaidan kontuhartzaileak datuak zuzentzean, nahi gabe okerra egin balu bezala erantzuten du, baina behin eta berriz datu oker berberez baliatzen da gauzak itsuraldatzeko. Horixe egin du azkenaldian prentsan herritar batekin izandako eztabaidan, eta datu oker asko erabili ditu tartean.
Pertsonal sailaren eta kontuhartzailearen datuen arabera, 2007an alkateak 60.740 euroko soldata zuen eta gobernu aldaketarekin 35.210era jaitsi zen; Joxean Rekondok 29.558 kobratu zituen eta Marian Beitialarrangoitiak 20.442, beraz 2007an Udalak 10.000 eurotik gora aurreztu zituen soilik alkatearen soldatan. 2008an alkateak 36.869 kobratu zituen (23.871 gutxiago), 2009an berriz 37.753 (22.987 gutxiago), eta 2010ean 38.433 kobratuko ditu (22.307 gutxiago). Horien batura egitea nahikoa da aurrezpena 79.907 eurokoa izan dela jakiteko. J. R. Chicak berriz 2007an hilero Marian Beitialarrangoitiak baino 1.400 euro gehiago kobratzen zituen.
Horrez gain J. R. Chicak aipatu izan du alkatearen soldatarekin aurreztua aholkulariak ordaintzeko erabili izan dela, eta hau ere ez da zuzena. Kontuhartzaileak emandako kopuruen arabera zinegotzi, alkate eta aholkularien gastua 2006an 428.721 eurokoa izan zen, 2007an 349.950ekoa, 2008an 306.738koa eta 2009an 324.414koa. Horri lotuz gero 2010ean aholkulari bat gutxiago duela gobernu taldeak, erraz ondorioztatuko du edozeinek gastua gehiago mugatuko dela.
Hau guztia esanda erantzun nahi nioke PSEko ordezkariari, datu okerrekin ez doala oso urruti erraz konproba baititzake edozein hernaniarrek. Bestetik ea noiz egiten duen proposamen bat berak jasotzen duena murrizteko, gobernu talde honek egin ohi duen moduan, nahi badu irudi hutsagatik, baina egin dezala, orain beste batzuk egin nahian dabiltzan moduan Madrilgo dekretuaren aurrean beraien gehiegikeriak arintzeko edo. Eta azkenik esan nahi nioke elkartasuna ez zaiela besteei eskatu behar, norberak erakutsi baizik, eta bera nire egoera berean dagoenez, ea noiz proposatzen duen jasotzen ditugun asistentzia dietak kentzea, nik alde bozkatuko dut.