Xake joko baten parekoa da gure gizartea. Fitxa pila bat, talde eta pertsonak elkarrekin gurutzatuz; batzuetan batak besteari lekua kenduz, besteetan irribarrea elkarri eskainiz. Gure herritxo honetan nahiago genuke, bigarrenetik gehiago balitz lehenengotik baino. Elkarri lagundu eta babesa emango bagenio. Jokotik baino jolasetik gehiago balu gure xake partidak.
Amher SOS Arrazakeriak antolatutako aste multikulturala ospatzen den honetan, Kooperazio Taldeak bat egin du egitarauaren osaketan. Amher elkarteak zein Kooperazio Taldeak bizikidetasuna elkarlanaren bidez bultzatu behar dela uste baitugu. Kultur aniztasuna herritar guztiontzat aberasgarria dela sinesten dugu, bertakoa eta haruntzagokoa errespetatuz, elkar-integratzea bilatu behar dela defendatzen baitugu.
Gaur, arratsaldeko 19:30etan, Biterin gizarte integratzaile baten aldeko aldarria egingo da. Mundu justuago baten eskaria alegia. Oihulari Klown antzerki konpainiaren Xake obraren emanaldia antolatu dugu ordu horretarako; bertan, migrazio mugimenduak, kontsumo arduratsua, parekidetasuna eta beste hainbat gaiez arituko dira taulagaineko aktoreak.
Aniztasuna guztion artean egiten dugu. Horregatik, hernaniarrak, integraziorako bidean, honekin edo harekin, bakoitzak bere ahalmenen arabera, helburu honen bila elkartu eta jolastera animatzen zaituztegu.
Ane Iturbe Mujika
eta Maddi Garcia
AMHER elkartea eta Hernaniko Kooperazio Taldeko kideak