Barrakak direla eta, herritarrei gutuna

( Idurre Lucas Ezkioga Kultura delegatua ) Konturatuko zineten San Joan jaiak hastear daudela eta barrakarik ez dagoela. Honen harira zera adierazi nahiko genuke: hasteko ez dela inondik inora Udalaren nahia San Joan jaietan barrakarik ez egotea. Ferianteekin lehenengo kontaktua apirilean izan genuen, aurten barrakak kokatzeko tokiari buruz hitz egiteko. Udalak kokapen egokiena Karabel zela adierazi zuen eta horixe proposatu, iaz egin zuen bezala. Iaz jakinarazi zitzaien Uru­mea ondoko tartea ez zela egokia arrazoi ezberdinengatik eta etorkizunean Karabelera joan beharko zutela, pentsatzen baitugu ez dela toki txarra, are gutxiago orain inguruan egin den aparkaleku berriarekin eta igogailuarekin. Iaz azkenean Urumea ikastola ondoan jartzea onar­tzen genuen azken urtea zela esan genien ferianteei eta festak hasi ondoren beraiek ere aitortu ziguten Urumea ondokoa ez zela eremu ego­kia. Udalarentzat toki aldaketa proposatzeko arrazoi nagusia segurtasuna izan da, baina baita Kara­belen barraka eta autokarabanentzat espazio nahiko dagoela ere. Kara­belen leku egokiagoa antolatu daiteke eta oinezkoen segurtasuna ber­ma­tzen dugu, espazio nahikoa da­goelako eta autoei pasabidea kenduz oinezkoen esparrua izango delako barraka ingurukoa. Horrez gain Txantxi­lla­ko obrak erdigunean aparkatzeko aukerak murriztu ditu, barrakak jarriz Urumeako patioa kentzeak arazoak areagotuz. Aurreneko bilera honen ostean ekainaren 7ra arte ez dugu ferianteen berri izan, eta egun horretan egin ziguten proposamena onartezina iru­ditu zitzaigun. Karabelen kokatuz gero haurren atrakzioetan bi­dai­ako %66ko igoera proposatu zuten ( 1,20€tik 2€tara) eta helduen kasuan %38koa (1,80€etatik, 2,50€etara). Hau ez onartzeko arrazoiak baditugu: orain urte batzuk ferianteei lur okupazioa ez kobratzea erabaki zu­en Udalak, ordainetan herritarren­tzako prezio merkeagoak jartzearen truke eta gaur egun ere irizpide berberarekin jarraitzen dugu, hau da, Udalak ez die ferianteei barrakak jar­tzeko okupatzen duten udal lu­rragatik ezer kobratzen. Egia da, Karabelen jartzeak be­raien gastuetan igoera bat suposatuko lukeela baina ez beraiek proposatutakoaren neurrikoa. Hain justu, Udala prest zegoen prezioak igotzeko baimena emateko, baina neurri apalagoan, herritarrentzat eramangarriagoak izango ziren prezioak ezarriz. Udalaren azken proposamena haurren atrakzioetan %25 igotzea izan da eta helduen kasuan %15a. Proposamen honen aurrean eta Udalak edozer ametituko ez ziela jakinda, azken egunean, herenegun bertan, saiatu dira Urumea ondoan kokatzearen truke prezio igoerarik ez dutela onartuko eta bi urtetako konpromiso bat hitzartzen. Baina ematen zizkiguten argudioen aurrean gauzak idatziz jartzen saiatu garenean atzera egin dute eta gezurrak tarteko xantaia egiten saiatu dira, jakin badakitelako guk barrakak egotea nahi dugula eta gure ahalegina horretan jarri dugula, baina noski ez edozein preziotan. Ikusi dutenean soka gehiegi tenkatu dutela denboraren argudioa ere erabili dute, ez dagoela gauzak Kara­belen munta­tzeko denbora, baina gu­re ustez azken hau beste aitzakia bat baino ez da, nahi izan balute nahikoa denbora izan da gauzak ondo aztertu eta hitzartzeko, baina azken unean edozer ametituko ge­nuela uste izanak eraman ditu egoera honetara. Gure galdera da, non ibili dira lehen ida­tzia jaso zutenetik orain arte? Nolaz da posible gastuei aurre egiteko %66ko prezio igoera nahitaezkoa jotzea orain astebete eta azken egunean prezioak ez igotzearen aldeko proposamena egitea beste hainbat baldintza betez gero? Ez da kontu honetan azken emaitza Udalak bilatu duena, baina gure ustez jende asko barraken zain egoteak ezin gaitu edozer gauza ametitzera eraman. Iaz ontzat eman zuten aurten tokiz aldatzea, aurten berriro atzeratzen saiatu dira, eta prezioekin egin duten jokoarekin, aurten onartu izan bagenu urtez urte hortik gora igotzea onartu beharko genuke, eta hori herritarrei lapurreta egitea iruditzen zaigu. Horregatik, azkenean, fe­rian­­­­­teek Hernanira ez etortzea erabaki dute eta aurtengo San Joan jaietan ez da barrakarik izango. Horren ordez, Udalak puzgarriak jarriko ditu.