Aupa Hernani eta aupa Astigarraga

( Nekane Zuaznabar Santa Kruz ) Astigartarra izatez, 10 urte daramatzat Hernanin bizi­tzen, eta beste astigartar askok bezala, bertan bizi gabe ere, Hernanirekin harreman estua eduki dut betidanik. Eta esan beharra daukat hondakin kontu hauetan harro nagoela hernaniarrez eta lotsatuta Astigarragako alkatearekin. Harro nago gainera Astigarrako eta Hernaniko herritarrok daukagun harreman estuarekin. Horregatik salatzeko modukoa iruditzen zait alkate jaunak erakusten duen fede txarra, itsukeri eta autismoa. Nola ulertu bestela hainbat makro proiektu txikitzaile onartzeko eta publikoki de­fen­datzeko lotsarik ez duen giza semeak; Asti­ga­rragako lur eremua hondatuko duen AHT, ehundaka miloi euro kostatuko zaigun Errauste planta, ondoko herritarrei inongo aukerarik ez ematea hondakinen tratamendurako sistema eraginkor eta jasangarriak probatzeko. Are gehiago, ondoko herritarren eskubideak mu­rriz­ten saiatzeko epaitegi bidez. Nor da bera ondoko herritarrok zer egin eta zer egin behar ez dugun erabakitzeko? Imaginatzen dut zeren beldur den Astigarragako alkatea; bertako herritarrak ez ote diren laster batean atez atekoa eskatzen hasiko. Azken finean alkate jauna, hondakinen inguruko arazo larri berak ditugu hernaniar eta astigartarrok, Uru­mea ibaiak bezala, errauste plantak modu berean eragiten digu hernaniar eta astigartarroi. Hain kezkatua badago, al­kate jaunak har ditzala behar dituen neurriak, baina sistematikoki atez ateko bilketa eta Her­naniko herritarrak deskalifikatu gabe. Gainera jakin dezala soluzio bakarra daukala halako tripako min eta kezka eragiten dion arazoa konpon­tzeko; atez atekoa ezarri As­tigarragan. Bere herritarrek eta ingurugiroek eskertuko diote. Azkenik Astigarragako herritarrak bultzatu nahi nituzke atez atekoaren aldeko urratsak eman ditzaten, pentsatu baino errazagoa baita. Aupa Hernani eta aupa Astigarraga.