Ormazabal jaunak irakurri gabe sinatzen du
Nahiz eta hamaika aldiz errepikatu, gezur bat ez da inoiz egia izango. Pernandoren egia hau Gipuzkoako Hondakinen Partzuergoko lehendakaria den Ormazabal jaunak oraingoz behintzat ez du ezagutu. Horregatik, Gipuzkoan zaborren erraustegia inposatzeko sortu duten gezurretan eta sasiegietan oinarritutako diskurtsoa behin eta berriro ere errepikatu egiten du mundu guztia ondo asko aspertu arte. (...)
Garai hauetan erraustegiari esker «hondakinak biltzeko zabortegien sistema behin betiko alboratzeko» egokia dela esatea, jaun txit agurgarri horrek defendatzen duen proiektua ez duela ezta irakurri ere egin adierazten du; edo erraustegiak sortzen dituen errautsak eta zepak etxeko alfonbra azpian gordeko ditu? Aditu, Ormazabal jauna: errausketak hondakinak sortu egiten ditu, %30-35 inguru, eta horiek gordetzeko segurtasun handiko zabortegiak ezinbestekoak dira. Beraz, zuen proposamenari esker, erraustegiarekin betiko zabortegietatik segurtasun handiko zabortegietara pasako ginateke eta hori ez da, inolaz ere, «zabortegiak behin betiko alboratzea». Baina handiena ez da faltsukeria hori; handiena sinatzaileak berak lerro batzuk aurrerago gauza bera aitortzea: «instalazioak eratuko dituen errautsak hondakin arriskutsuentzako zabortegi batean tratatuko dira». Eta hori paragrafo gutxi batzuk aurrerago zabortegiei betiko agurra eman dienak. Ormazabalek sinatzen duena ez du ezta irakurri ere egiten.
Eta beste hau sinatu duenean: «gure lurraldean hondakinen kudeaketan aro berri zabaldu zen, munduko eredu aurreratuenetakoa». Harrigarria. Izango da enpresa munduan, jauntxo hauek mugitzen diren munduan alegia, zeren eta bestean, mundu errealean, gaur egun eredu aurreratuena, ´zero zabor` lemapean zabaltzen ari dena da eta horretan errausketa ez da ezta txantxetan ere aipatzen. (...)
Ormazabal jaunak kea saldu nahi du. Eta horretarako, zerbait gogorrago ez esateagatik, bost axola kontraesanak sinatu baditu. Benetako aukera Usurbilen dago, atez ateko aukeran; horri esker zabortegira eramateko hondakinak %20a baino txikiagoa baita. Baina hori ikusteko kalera atera behar da eta hori inoiz ez du egingo Ormazabal jauna bezalako politikari profesional batek. Dirua beti itsu.
José Ramón Zabala Agirre