Auzo udala zertarako? Galdetuko dute batzuk. Auzoa biziberritzeko; bailara osoko etxe, auzo-gune, eta auzotar guztiei bilgune bat eskaintzeko. Urte osoko kultur programazio bat eskaintzeko. Adineko pertsonak auzoan eroso bizitzeko. Zainketa exkaxa duten bideak, plazak, udal eraikinak edo lorategiak egoera onean mantentzeko. Inbertsio txikiak egiteko. Udal tramiteei buruzko zalantzak argitzeko eta orokorrean herritarrei zerbitzuak gerturatzeko.
Hori bakarrik? Esango du beste batek. Ez pentsa, ez da lan makala izango. Auzo udalak bere ondarea mantentzea du abiapuntua, baina orain kultur eta gizarte arloak bezala gerora ere bi aldeek adostuz gero, beste hainbat konpetentzia jaso ditzake auzo udalak, dagokion aurrekontuarekin batera.
Merezi al du? Galdetuko du hirugarrenak. Auzotarren arteko elkarlana beharko da, baina prest gaude horretarako. Ardurak hartuko dituztenak beharko dira, eta haiek inguruan babesa beharko dute. Auzolanean egin beharko ditugu hainbat gauza, baina dakigun bezala, auzolana lana adina festa da, izerdia adina ilusioa.
Diru horrekin iritsiko al da zeozertarako? Kezka hori izan arren, buruari eragin beharko diogu: diru gutxirekin etekin haundia atera. Obra baterako iristen denean, bi egin auzolanari esker. Borondatezko lana saritu, dirulaguntzak lortu. Ate guztiak jo eta gero, beharrezkoa bada, kreditu bat eskatu.
Galderak asko dira baina erantzuna bakarra: Nik BAI esango diot auzo udalari. Eta zuk?
Zatoz eta parte hartu auzo galdeketan, martxoaren 28an, 10:00etatik 18:00etara Ereñotzuko kultur etxean.
Amaia Miner Canflanca Ereñotzuko Olak Auzo Elkarteko kidea