Herritarren parte hartzea, bai Dudipe!

( Mikel Arrieta Iraola ) Herritarren parte hartzea oso gai garrantzitsua da; hain garrantzitsua ezin dugula utzi salatu gabe Hamaika Bat alderdia, edo Hernaniko EAJ egiten ari diren joko hipokrita eta demagogikoa. Ildo honetatik hainbat datu gogoratu nahi dizkiet hernaniarrei: -Gogoratu nahi dut ezker abertzaleak gidatutako uda­la izan dela Hernanin Herri galdeketa bat antolatzen le­he­na. Eta gainera funtsezko gai baten inguruan: gure he­rriak zer azpiegitura publiko be­har dituen. Herritarrek kul­tur gunearen aldeko apus­tua egin dute eta hara non, ezker aber­tzalea izan den bakarra herritarren erabakia onartzen eta berea egiten. Non daude gainontzekoak? Zergatik ez dute onartzen herriaren hitza? -Hernanin egin den sinadura bilketa masiboena Erraus­keta Planta egitearen aurkakoa izan da. 3.000 lagunek baino gehiagok sinatu ge­­nuen. EAJ-PSOE eta Hamaika Bateko zinegotziek kasu egin al zieten sinadura horiei? -Bai EAJak, bai Hamaika Bat-eko kideek, beste izen batekin bada ere, 30 urte da­ra­mazkite Gipuzkoako Foru Aldundia gobernatzen: zenbat galdeketa antolatu dituzte? Ba al dute inoiz asmorik gipuzkoarrei galde­tzeko Errausketa plantari buruz, Pasaiako portuari buruz edo errepideetan jarri nahi dituzten peajeei buruz? -Beti defendatuko dut herritarren parte hartzeko es­ku­bidea, baina Hamaika Bat-eko zinego­tzi bat udal langileei sinadura eskatzen aritzen denean, eta PNVeko beste zin­egotzi bat udalean ari­tzen bada sinadura orrialdeen ko­piak ateratzen, edo PSOEko zinegotzi batek hainbat dendetan sinadura biltzeko orriak banatzen baditu, eskubidea dut pen­tsatzeko, egitasmo ho­rrek interes politiko zehatz ba­tzuei erantzuten diela. -Azkenik esan, gai honetan herri galdeketaren alde nagoela, Usurbilen egin den mo­duan, behin Atez Atekoa mar­txan jarrita, eta zuzen zu­ze­nean ezagututa. Han praktikak erakutsi du hasieran aur­ka zeudenetako asko sistemaren aldeko bihurtu direla; esaterako, Usurbileko EAJ, zeina alderdikeriak baztertu eta Atez Ateko sistemaren aldeko kanpaina egiten ari den.