Ikastetxe bakarra, zergatik ez bi?

( Itziar Pagoaga eta Pello Erdozia Langile BHIko 17 irakasleen izenean ) Bakarra baino hobe oinarriduna, oinarririk gabeko etxeak ez baitira sendoak. Hernanin saiakera desberdinak egin dira eskolen arteko elkarketak bultzatzeko; baina arrazoiak arrazoi, ez dira aurrera atera. Ez gaitezen, bada, elkarren artean errudunak bilatzen hasi eta onar dezagun eskolen artean diferentziak daudela eta bakoi­tza berearekin gustura dagoela. Badirudi Bigarren Hezkun­tza­ko herriko hiru ikastetxek begi onez ikusten dutela elkarrekin lanean aritzea eta gustura ekingo diotela proiektu berri horri. Aurrera! Baina Hezkuntza Sailari eskatu behar diogu errealitatea errespetatzeko, badagoelako laugarren ikastetxe bat bereari eutsi nahi diona; beraz, ez behartzeko batzera nahi ez duen komunitate handi bati, horrek mina besterik ez baitu ekarriko. Benetako elkarketa bat bul­tzatu nahi bada bitartekoak ja­rri behar dira, gerturatze pro­ze­su bat prestatu, denbora eman, lana eta ilusioa jarri eta pazientzia handia eduki. Ez al du ba esperientziak erakutsi, egun planteatzen den moduko elkarketek ez dutela, hain zu­zen, eskolak sendotzeko balio, egoerak zailtzeko baizik?. Ez dezagun gure artean giro txarra sortu eta errespeta gaitezen, bakoitzaren egiteko, ulertzeko erak aberatsak direla sinistuz eta bultzatuz. Bukatzeko, ziur gaude elkarlanak eramango gaituela benetako elkarketa batera eta ez dekretazio bideak.