Gune publikoak eta zakurrak: arazo konponezina?

( Goio Irazusta, elkartekideak idatzia; eta, Koxka asanbladak onartua, aho batez. ) Zenbait hernaniarrek urteak eman ditugu gure Udalean buru izan diren kolore guztietako agintariei hauxe eskatuz: konpondu dezatela zakurren arazoa. Egia da badirela zakur-nagusi asko bere zakurra ondo erakutsia dutenak, eta, saiatzen direnak bere zakurrak inor molestatu ez dezan; eta, txukun-txukun, kaka-mokordoa biltzen dutenak, kale erdian (nazkagarria!) utzi gabe. Baina, egia da era berean, badirela beste asko bere zakurraz `paso` egiten dutenak; eta nagusi horiexek dira arazoa sortzen dutenak: denoi eragiten digun arazoa, hain zuzen ere. Egia ere bada, orain arteko kolore guztietako udal korporazio guztiek bere ahalegintxoak egin dituztela; baina, azkenean, denek ere etsi egin dute; eta, oraindik ere, arazoak hor dirau, bere hartan, konpondu gabe. Koxka elkartea osatzen dugun pertsonontzat, arazoa areagotu egiten da, baldin eta kalean zehar ibili behar duena itsua bada, edo gurpil-karrotxan badihoa: ezin dute etxera itzuli, bere zapata-zolak, edo gurpilak, zikindu gabe: ezin ihes egin kaka-mokordoari. Horregatik beragatik, Koxka elkartekook eskatu egiten diogu Udal honi, benetako eragina izango duten neurriak hartu ditzan, nagusi axolagabeen zakurrek sortzen duten arazoa konpontzeko.