Intzineradora, klimarentzako ere kaltegarria

( Mikel Otegi Uzkudun Hernanin Zero Zabor ) Errausketa eta Atez Atekoak (A-A) oso ondorio ezberdinak dituzte herritarrentzako: bai osasunean, bai dirutan eta bai ingurumenarekiko errespetoan. Aste hauetan Grenpeace erakundeak oso azterketa garrantzitsua plazaratu du: ´Incineración de residuos: malos humos para el clima`. Interneten errez aurki daiteke, Her­nanin Zero Zabor taldearen blogean ere jarri dugu lotura. Merezi du ezagutzea. Greenpeacek erakutsi du, nazioarteko beste erakunde askok egin bezala, herritarron osasunarentzako da­kar­tzan kalteez gain, klimaren aldaketaren kontrako estrategian sekulako ekibokazioa dela hondakinak In­tzineradoretan kixkaltzea. Hasteko, errausketaren al­de­koek sistema horri ´valorización energética` deitzen dioten arren, oso energia gutxi sortzen dute Intzine­radorek, gehienetan gasez edo petrolioz lagunduta kixkaltzen dituzte zaborrak, eta subentzioei esker ateratzen diote errentagarritasuna hor sortutako elektrizitateari. Errausketak klimaren al­da­keta eragiten duten gasak sortzen ditu, funtsean karbono dioxidoa (C02) eta are gaiztoagoa den oxido nitrikoa ere bai (N20). Bai energia sortzeari edo aurrezteari dagokionez eta bai gas kaltegarrien isurketan, errausketak askoz numero txarragoak eskaintzen ditu A-A­ko­a bezalako sistema baten aldean. Eta gainera material asko birtziklatu zitezkenak betirako galtzen dira kixkalita. Errausketa enpresa handi batzuen negozioa da, eta Green­peacek eskainitzen ditu horretaz datuak. Gaur arte Espainian 664 milioi euro inbertitu dira intzineradorak eraikitzen, eta proi­ektu guztiak eginez gero 1.777 milioiko inbertsioa izango da. Gaur Espainian kixkaltzen diren bi milioi tona hondakinek 120 milioi euroko fakturazioa osatzen dute. Eta herritarrok gero eta hondakin gehiago sor­tzen dugunez... Intzineradorek oso langile gutxi enplegatzen dute. Esate baterako, Bizkaiko Zabalgarbik hamaika besterik ez, 280.000 tona kixkaltzeko. Baina lanpostu gutxiago sortuta ere, ere askoz garestiago ateratzen zaigu herritarroi. Intzineradoreta­ko enpresek ondo lotuta baitauzkate urte luzetarako beren kontratuak. Garestia, klimaren aldaketa okerragotzen duena, osasunaren kaltegarri... Zubie­tako errauste plantak ekarriko dizkigun ´bentajak` gertuagotik ezagutu nahi dituenak, ez dauka Greenpeacen artikulu hori irakurri besterik.