( Ibon Zapiain
Hernanin Zero Zabor Taldea ) Hernaniko Udalak etxeetako hondakinak Atez Ateko sistemaren bidez biltzea erabaki zuenetik, horixe da konbertsazio askotan atera den kontua. ´Usurbilen bai, herri txikia da eta. Baina Hernani askoz handiagoa da`. Edo beste hau: ´Bloketan jende asko bizi den lekuan funtzionatuko al du?`.
Argi eta garbi esan behar da: Atez Ateko sistema mundu osoan usatzen da. Ingelesez ´Door-to-door waste collection` deitzen zaiona bost kontinenteetan egiten da, hori bai, modu ezberdinetan, baina egiten da bai herrialde aberatsetan eta bai pobreetan, izan herri txikietan edo hiri handietan. Hemen muestra bakan batzuk aipatuko ditugu, Hernanin udaberrian hasiko den Atez Atekoaren antzekoa egiten duten lekuetakoak.
Italian Atez Atekoari deitzen zaio ´Raccolta differenziata porta a porta`. Hau herri txiki askotan egiten da, baina guk hiri handi batzuk aipatuko ditugu, Hernaniren tamainakoak edo dexentez handiagoak: Monza (121.400 biztanle), Piossasco (17.000), Asti (75.800), Novara (104.000) , Varese (81.000), Reggio Emilia (166.000), Veneziako Dorsoduro auzoa (17.500), Torino-Turingo 5. eta 7. auzoak (190.000 biztanle denetara), Alessandria (94.000), Capannori (45.500). Erroman bertan (900.000 biztanle) 2010ean instalatuko da Atez Atekoa; dagonekoz Ciampino auzoan (38.900) martxan daukate.
Frantzian herri eta mankomunitate askotan egiten da Atez Atekoa. Hiri handietan, oraintxe hasi dira Bordeleko zentroko auzo batzuetan. Eta Niort hirian (60.400 biztanle) aspalditik ari dira.
Katalunian Atez Ateko sistemarekin funtzionatzen duten herriek osatuta daukate elkartea: Associació de Municipis Catalans per a la Recollida Porta a Porta. Alde batera utzita txiki asko, handi hauetan ere egiten da: Gavà (45.190 biztanle), Blanes (39.100), Canet de Mar (13.381), Esparreguera (21.451), Palau-Solià i Plegamans (13.916), Torredembarra (15.056)...
Ez dugu zerrenda luzatuko. Hernaniko gizon eta emakumeek, gazteek eta zaharrek, jakin behar dute Atez Ateko bilketa leku askotan egiten dela. Demostratuta dago: Atez Ateko sistema Intzineradora baino askoz hobea da denon osasunarentzako, dirutan merkeagoa da... eta herritar guztiek egunero egiteko errexa.
Kronika egunero, euskaraz eta doan jasotzen segi ahal izateko, Kronikakide gehiago behar dira, eta zer esanik ez, proiektu komunikatibo sendo eta profesional bat garatu nahi badugu.
Egin zaitez KronikaKide!