Le plaisir du chocololat... dio iragarki batek

( Jexux Eizagirre ) Ados. Neuk ere maite dut txokolatea... beltza… kakao asko duena (%70).Zuhaitz koxkor batek ematen du kakaoa. Kakao zuhaixka Ameri­ketakoa da, jatorriz. Jainkoen Janari, deitzen diote indioek Ekuador estatuan, Los Rios eta El Oro-ko lurretan, milioika landare zeuden, duela 200 urte. (Gerora, bi herri horiek ondotxo ezagutu dute euskal misiolariek.) Kakao lanerako, esklaboak behar ziren: Espainia, soilik, 1.600.000 esklaboren jaun eta jabe zen: gehienak Afrikatik eramanak (asko, euskal ontzietan). Dirutza handia egin zuten terratenienteek: la pepa de oro deitzen zioten kakaoari. (Ikus, liburutegian Ekua­dorrez dagoen erakusketa.) Esklabo jendeak, matxete kolpez, kateak eten zituenean (Ekuadorren, 1851.urtean), Afrikara emigratuko zuen kakao landareak, luberri bila: Bolikosta, Ghana... Izen berria ere jarri diote kakaoari: urre marroia. Afrikan, 300.000 ume (9-12 urteko) bihurtu dute esklabo, kakao merke eta ona ateratzeko. Nestle da esklabo jende horri etekin gehien ateratzen dionetako bat, lotsa handirik gabe. Multinazionalaren buru batek kazetari bati honela erantzun baitzion: ´Ados. Nahi baduzu, esklaboak izango dira; baina, denok dakigu, bestela ere, ume horiek pobre izango direla, beti`. Nestlek, iaz, %70 gehiago irabazi zuen: 12.000 milioi euro: Etiopia osoko gosea hiltzeko: 400 milioi, nahikoa. Wukroko jendea dihoan ospitalera, ume bat ekarri dute, gaur: Mubarek du izena. Kilotan, %70 gutxiago pisatzen du, hemengo batek baino. Afrikan, milioika Mubarek daude. Gehienak, ataka batean sartuta: edo esklabo bihurtu, edo goseak hil, edo... Le plaisir du chocolat: Nestle! iragarkiak, 25 segundo iraun du: 5 gramo txokolatek ahoan irauten duena: une horretan, munduan, 5 ume irentsi ditu goseak. Zein gerrak akabatzen ditu hainbeste ume? dio Olaranek.